باسم قاسم شنگالی:جەژنێن ئێزيدیان دناڤبەرا هەبوون و ووندابوونێ دا

جەژنێن ئێزيدیان دناڤبەرا هەبوون و ووندابوونێ دا 
باسم قاسم شنگالی

ب دەهان جەژنێن ئێزدیان هەنە ، هەر جەژنەکێ رێوره‌سمێن خۆ یێن جڤاکی و رێورسمێن خۆ یێن ئایينی هەنە ، بەری داگيرکرنا شنگال بەریا سێ سالا ب شێوەیەکی نۆرمال رێوره‌سمێن جەژنێن ئێزدیان ل لالشێ دهاتنە گێران ژلایێ جڤاتا رۆحانی ڤە و ب ئامادەبوونا ب هەزاران ژ ئێزيدیان و ژ وه‌لاتێن جودا جودا قەستا لالشێ دکرن،داکو گێرانا رێوره‌سمێن جەژنا ببینن  وەک رێوره‌سمێن جەژنێن(جەمایا شیخادی ، چارشەما سۆر ، چلێ هاڤینێ ، چلێ زڤستانێ ، قوربانى ...هتد ) و هەروه‌سا لناڤا جڤاکى دا ژی رێوره‌سمێن ئەڤان جەژنان دهاتنە گێران و ب دلخۆشیڤە جەژن دچوونە سەرا ، لێ پشتی داگیرکرنا شنگال و ئاوارەبوونا ب سەدان هەزاران ژ ئێزيدیان بۆ هەرێما کوردستانێ و کوشتنا ب هەزاران ژ ئێزيدیان و گرتن و ئەشکەنجەدانا وان ژلایێ دڕەندترین رێکخراوا تیرۆرستی ل جیهانێ دا یا ناڤدار ب داعش ، جڤاتا رۆحانیا ئێزيدیان و هەروه‌سا بابا شێخ کو ب بابێ رۆحی یێ ئێزيدیان دئێتە هژمارتن بریاردا کو رێوره‌سمێن جەژنێن ئێزيدیان یێن ئایينی کو ل لالشێ دئێنە گێران بێنە ڕاگرتن بۆ دەمەکی وەک رێزگرتنەک بۆ خوونا وان جانگۆرى و وەک رێز بۆ وان ئێزيدیێن کو دیل کەتینە ددەستێ داعشێ دا و ئەڤ بریار هاتە بجهئینان و هەر ژوێ رۆژێدا چ رێوره‌سم نەهاتینە گێران ل لالشێ ، ئەڤه‌ بۆ ماوێ سێ سالا رێوره‌سم نەهاتینە گێران لێ بۆچۆنێن مەترسیدار لسەر ڤێ چەندێ هەنە ژبەرکو ئەگەر جڤاتا رۆحانی بەردەوام بوو د بجهئینانا ئەڤێ بریارێ دا کو رێوره‌سم نەئێنە گێران مەترسیەکا مەزن لسەر رێوره‌سمێن جەژنێن ئێزيدیان دا هەیە ژ وندابوونا ڤان رێوره‌سمان و دەرباری ئەڤێ چەندێ بريارا ڕاگرتنا رێوره‌سمان ژ لایێ جڤاتا رۆحانی و بابا شێخ ڤە بریارەکا ل جيێ خۆدا بوو ل دەمەکی کو ئێزيدیان هەموو جۆرێن ئێش و ئازارا کێشاین و کەتنە بەر پێلەکێ ژ کوشتن و گرتن و دەربەدەرکرن و ئەشکەنجەدانێ دا،بەلێ پێدڤیە هەتا ڕادەیەکى ئەڤ بریار دکاردا بێ ئانکو پێدڤیە سنوورەک بۆ ڤێ بریارێ بێتە دان ژ بەرکو مەترسیا وندابوونا ئەڤان رێوره‌سمان هەیە ژبەرکو پێدڤیە ئێکسەر ئەڤ رێوره‌سمە بێنە پێش چاڤێن ته‌خا گەنجان،داکو پێزانین لسەر ئەنجامدانا ئەڤان رێوره‌سمان پتر هەبن و هەروه‌سا  کو نە ئەنجامدانا رێوره‌سمێن جەژنان ل لالشێ مەترسی لسەر جڤاکا ئێزدی  ژی هەیە،چنکو هەموو تێکست و قەول و بەیتێن ئێزيدیان دوان رێوره‌سمان دا دئێنە ل پێش چاڤ و دئێنە بهیستن  کو پێدڤیە پتر پووتە ب ڤان رێوره‌سمان بێتە دان ژلایێ جڤاتا رۆحانیا ئێزيدیان ڤە و بێنە گێران چنکو ئەگەر نەهاتنە گێران وەک کێماسیەکێ بۆ جڤاتا رۆحانی دئێتە هژمارتن بەلێ ل دەمێ کارەساتا کو بسەرێ ئێزدیان دا هاتی جڤاتا رۆحانی هاتە دەنگ و وەک رێزگرتنەک بۆ قوربانیێن ئەڤێ کارەساتێ و بۆ وان عەزیزێن کو کەتینە ددەستێ داعشێ دا وەک دیل لێ ئەو کەسێ جانگۆرى کەتی دوێ کارەساتێ دا ئوغرا هەتا هەتایی کر و ڤەگەر ژبۆ وی نەما ، و ئەو کەسێن کو کەتینە ددەستێ داعشێ دا پێدڤی دوعایێن مەنە و ئەم ژ خودێ ب هیڤی نە کو یەک کەسێ ئێزدی وەک دیل ددەستێ داعشێ دا بێنە رزگارکرن و ژ ئازادیێ تام بکن و ئەو کەسێ کو زه‌حمەت دیتی لڤێ کارەساتێ دا و ئەشکەنجەبووى دێ برینێن وی ساغبن و جارەک دن ل ژیانێ زڤرێ ب شێوەیەکێ ئاسايی لێ هەر کەسەکی کو ئاکنجیێ باژێرێ شنگال و گوند و کۆمەڵگەهێن دەوروبەرێن شنگال بێ چیرۆکەکا خۆ یا تایبەت هەیە و به‌هرا خۆ ژ کارەساتێ بریە ئەڤجا ئەو کەسێ چووی چوو و یێن دیل ژی ب ئانه‌هیا خودێ مەزن دێ زڤرن ئێدی پێدڤیە رێوره‌سمێن ئایينی یێن جەژنێن مە ل لالشێ بێنە گێران داکو نەئێنە ژ بیرکرن و ونداکرن و ئەگەر نا دێ وەک پشت گوەهاڤێتنەکێ ژ جڤاتا رۆحانی را ئێتە هژمارتن کو ئەڤ ئاخڤتنە نە یا وی یا کەسایەتیا بەلکو دەنگێ ته‌خا گەنجێن ئێزيدیە ،ئەم شانازیێ ب ڤان رێوره‌سمان دبن وەک تشتەکێ لبەر چاڤ و گێرانا وان ئەرکه‌ لسه‌ر ملێ جڤاتا روحانی و دا دوژمن نەبێژت کو مە ئێزيدی ژناڤبرن ، ئێزيدی نائێنە ژناڤبرن چ جارا و دێ بەردەوام بن لسەر رێيا وی رێزانی یێ کو ئەڤ رێيە ل هه‌مبەر مە درێژ کری و ئێزيدیاتی ب سەدان هەزاران سالان یا هەی و ئەڤ رێوره‌سمە نەهاتینە ونداکرن و بەردەوام هاتینە گێران سەرەرای وان هەموو فەرمانێن کو ژ نە حەزێن ئێزيدیان دهاتنە سەرێ وان ،ئەڤجا ئەم داخوازێ ژ جڤاتا رۆحانیا ئێزيدیان  دکەین کو بەردەوامی ب گێرانا ڤان رێوره‌سمان بێتە دان و ل جەژنا جەمایا بێت دا ئەم ڤان رێوره‌سمان جارەکا دی ببینن و  ئەم سوپاسیا جڤاتا رۆحانی دکن بۆ ڤێ رێزگرتنا کو ل قوربانیێن مە گرتین لێ پێدڤیە ئەم رێوره‌سمێن خۆ بپارێزن داکو ئەم ژی نەبنە قوربانی و ژ نەمانێ و وندابوونێ رزگارببن.

تعليقات