برایێ ئاخرەتێ د باوەریا مه‌ ئێزدیان دا/مه‌هدى حه‌سه‌ن موراد

برایێ ئاخرەتێ د باوەریا مه‌ ئێزدیان دا/مه‌هدى حه‌سه‌ن موراد

برایێ ئاخرەتێ ئێك ژ فەڕزێن حەقیقەتێ یە دڤێت ھەر كوڕەكی ئێزدی برایێ ئاخرەتێ ھەبت و ھەر كچەكا ئێزدی ژی خوشكەكا ئاخرەتێ ھەبت ، ئەڤە ژی بۆ پەیوەندیەكا روحی یە ، چنكو ب وێ ھزرێ ل ئاخرەتێ دێ ھاریكاریا ھەڤ كەن ژبەر ھندێ ژی ب برا یان خوشكا ئاخرەتێ ھاتیە بناڤكرن ، ئەڤ چەنده‌ ژی ڤەدگرت بۆ سەر دەمێ شیخادی وەختێ ھاتی چەند گھۆڕین دناڤ ئێزدیاتیێ دا كرن مینا  سیستەمێ چیناتی  و  فەڕز دانانە سەر مرۆڤێ ئێزدی وەكی فەڕزێن حەقیقەتێ و فەڕزێن تەریقەتێ د ئێزدیاتیێ دا كرنا فەڕزێن دینی ، و ھەر كەسێ ئێزدی پێگيریێ ب ڤان فەڕزا نەكەت دێ گوننەھبار بت و ل رۆژا ئاخرەتێ رۆژا ھەق و حەسابێ دێ ئێتە سزادان دیسا دناڤ جڤاكی دا ژی نەیی دلخواز و خۆشتڤی یە و ب چاڤەكی سڤك لێ دنێرن ، فەڕزێن حەقیقەتێ (٥) فەڕزن و فەڕزێن تەریقەتێ (٦) فەڕزن ئەڤ برایێ ئاخرەتێ دبتە ئێك ژ ڤان فەڕزێن حەقیقەتێ 

١- شێخ 

٢- پیر 

٣- ھۆستا 

٤- مەرەبی 

٥- یار و برایێت ئاخرەتێ 

فەرە ھەر مرۆڤێ ئێزدی ھەر ژ میرێ شێخا و بابا شێخ و ھەتا بەلنگازەكی چ كور یان كچ شێخ و پیر و ھۆستا و مەرەبێن خۆ دگەل برایێ ئاخرەتێ ھەبن ، وھەر كەس ژ ڤان بەرپرسیارێ برا و مریدێ خۆیە ، ژبەركو د باوەریا مە ئێزدیان دا حەقیقەت و مالا ھەق یا مرۆڤی پشتی مرنێ یە ، ئانكو پشتی گیان ژ لەشی جودا دبت و بۆ ھەق و حسابێ دچت بەر دەستێ پەدشای، وێ رۆژێ خودانێن فەڕزێن حەقیقەتێ ھەر (٥) پێنچ ل حەزرەتا پەدشای ئامادەدبن لێ ھەگەر خێر و گوننەھێن وێ ھنجی ئێك بوون دێ جيێ وێ تاریستان بت ھنگی شێخ و پیر و یار و برێت ئاخرەتێ دكارن داخوازا بەخشین و لێبۆرینێ ل جەم پەدشای ژێرا بكەن و ژ تاریستانێ خلاس بكەن  لەوا دبێژین: 

شێخ فە رە - پیر نیشانە- ھۆستا و مەرەبی وەكی وانە - فەڕزا برایێ ئاخرەتێ فەڕزەك گرانە. 

لڤيده‌رێ دیار دبت برایێ ئاخرەتێ پتر ھەر چار فەڕزێن دیتر گرنگیا خۆ ھەیا ژبەركو ژ چینەكێ یە یان شیخە یان پبرە و برایێ ئاخرەتێ یە، لەوا فەرە ھەر مرۆڤه‌كی ئێزدی برایێ ئاخرەتێ ھەبت چ كوربت یان كچ دەمێ د گەھته‌ ھێمێ ژن ئینانێ فەڕە برایەكی ئاخرەتێ ژ شێخێ خۆ یان ژ پیرێ خۆ بگرت، ھەروەسا كچ ژی دڤێت خوشكا ئاخرەتێ ژ شێخێن خۆ یان ژ پیرێن خۆ بگرت.

بن ئادەمۆ تو ل ڤێ دنێ مێڤانی.

گەرەكە دەرباز بكە ب ئەدب و ئەركانی.

ھەر دێ رۆژەكێ زڤڕییە بەر دەستێت خودانی .

لەوما لسەر مە ئێزدیا فەرە پێگریێ ب فەڕزێن دینێ خۆ بكەین و كەرب و كینێ ژ دلێ خۆ پا ڤێژین و خۆ ژ ھەر تشتەكی حەرام دور بكەین ، پێگيری نەكرن ب ئەركان و رێ و رەسمێن دینی د جڤاكێ مەدا یی شەرمەزارە و لجەم خودێ تەعالا ژی گوننەھبارە وەكی ل ڤێ سەبەقا قەولی دا ھاتی :

دبێژمە وە گەلی گوننەھكارا .

ڕیێا یار و برایێت ئاخرەتێ مەكەن بازارا .

جیێ وە دۆژەیە و دەڤێت مارا .

برایێ ئاخرەتێ ژی دڤێت چەند  ساخلەتێن باش ھەبن :

١- دڤێت شارەزایەكا باش د ئێزدیاتیێ دا ھەبت. 

٢- دڤێت برایێ ئاخرەتێ د ڕێبەر و رێناس بن و ئاریشێن مللەتێ خۆ چارەبكەن دڤێت خودان رەوشت بت چ شێخ بت یان پیر بت. 

٣- دڤێت ب بەلاڤكرنا بیر وباوەرێن ئێزدیاتیێ رابن.

٤- یە فەرە شێخ و پیر د ئامادەبن ژبۆ ب جیھ ئینانا رێ و رەسم و حەد و سەدێن دینی دناڤ ئێزدیاندە. 

٥- خودان باشترین رەوشت و تیتالێن جڤاكی بن .

٦- چاخێ ئێزدیەك د كەفتە بەر مرنێ ھەر زوو گازی شێخ و پیر و خوشك وبرایێ ئاخرەتێ دكەن و ب ئەركێ خۆ رادبن ژبۆ رێ و رەسمێن ڤەشارتنا مری .

٧- فەرە برایێ ئاخرەتێ ژی ھەر ھەیامێ جارەكێ سەرەدانا برایێ خۆ بكەت و چەند شیرەت و ڕاسپاردەیێن ئاینی و جڤاكی ئارەستەیی برایێ خۆ بكەت. 

دیسا چەند ئەرك و كار ل سەر ھەر كەسێ ئێزدی ھەنە بەرامبەر برایێ ئاخرەتێ :

فەرە رێزەكا تایبەت ل برایێ خۆ یێ ئاخرەتێ بگرت ھەموو جەژنێن ئایينی بەری ھەر كەسی سەرەدانا برایێ خۆ یێ ئاخرەتێ بكەت و دیاریەكێ پێشكێشی وی بكەت ب ھەر رەنگەكی ھەبت و دلنیاكەت برایێ خۆ یێ ئاخرەتێ كار و دانوستاندنا وی دناڤا جڤاكی دا یە باشە و پێگيریا ڕێ و رەسمێن ئێزدیاتیێ دكەت برایێ خۆ یێ ئاخرەتێ رازى بكەت و دلخۆش بكەت كو ئەو مرۆڤەكی باشە، ژلایەكێ دیڤە فەرە رەسما برایێ خۆ یێ ئاخرەتێ بدەت كا چاوا رەسما شێخێ خۆ پیرێ خۆ دەت ھۆسا یا برایێ ئاخرەتێ ژی بدەت  ، ژبەركو وەكی مە بەری نھۆ گۆتی برایێ ئاخرەتێ ئێك ژ ھەر پێنچ فەڕزێن حەقیقەتێ ل حەزرەتا پەدشایی حازربت و دیدەڤانیێ (شەھدەیێ)لسەر باشی و خرابیێن وی و كارو بارێن وی یێن دنیایێ دەت ، ئەگەر مرۆڤەكی بێ رێز و تەرز بت ونەی پێگير بت ب رێ و رەسمێن ئێزدیاتیێ دێ ڕاستیا وی ئاشكەرا كەت ئەگەر یێ باش بت دێ ب بەھشتا بەرین شاد بت و ئەگەر یێ خراب  بت دێ ب سزایێ خۆ گەھت . 

رێ و رەسمێن دەست نیشان كرنا خوشك و برایێ ئاخرەتێ ..

١- ل ھێڤارا داوەتێ پشتی دەست نیشانكرنا  خوشك و برایێ خۆ یێ ئاخرەتێ زاڤا و بوك وخوشك و برایێن ئاخرەتێ داخاز دكەن  مینا گرێ بەستەكێ بڤی رەنگی ل ھێڤارا داوەتێ یان سبەیكا داوەتێ دئێتە ب رێڤەبرن  ب ڤان رێ و رەسما :

* ھەر ئێك ژ بوك و زاڤا دیاریەكا تایبەت پێشكێشی خوشك و برایێن خۆ دكەن و دچنە دەستێ وان و دبێژنێ خوشك و برایێن مە ھەروەسا بوك و زاڤا ژی دیاریەكا تایبەت پێشكێشی خوشك و برایێن خۆ دكەن .

* پەردەكا ئاڤێ دئینن و بەرامبەری ئێك دسه‌كنن و برایێ ئاخرەتێ بەراتەكێ دناڤ ڤێ پەردا ئاڤێ دكەت و د شێلن و ھەر ئێك سێ جارا ڤێ پەردا ئاڤێ پ سەر ئێك ڤەدكەن  و دبنە خوشك و برایێن ئێك ژبەركو بەرات ژ ئاخا لالشا پیرۆزە وب  ئاڤا كانیا سپی یە ڤسترایە و د باوەریا مە ئێزدیان دا ھەچی كچ وكور دگەل ئێك دناڤ زمزمێ وكانیا سپی دگەل ئێك ئاڤا ڤان ھەر دوو جھا ڤەخۆن دبن خوشك و برا. 

* ژ داب و نەریتێن مە پەریەكێ دناڤ ژۆرا بوك و زاڤا دا دادنێن فەره‌ خوشكا بوكێ و برایێ ئاخرەتێ ڤێ پەریێ گرێدەن .

* دەمێ پەریێ سواردكەن ب ھلھلاندن و دھۆل و زرنا و بوك و زاڤا دئێنە سەرێ خوشك و برایێن خۆ. 

* ل رۆژا داوەتێ ھەموویێ برایێ ئاخرەتێ یێ دگەل زاڤای و خوشكا بوكێ یا ل نك بوكێ. 

* ل ھێڤارا داوەتێ ئەگەر برا زاڤا ل گوندی بت زاڤای و ھەموو ھوگر و دۆستێن زاڤای د كەرمینت . 

* دەمێ زاڤا د چتە ژۆرا خۆ و ب ئەركێ خۆ رادبت بووك مریشكەكا سۆركری دگەل ھندەك جەرەزی ددەتە زاڤای و زاڤا ژی ددەتە برایێ خۆ یێ ئاخرەتێ و ئەو د چنە مالا زاڤا مێڤان كری و ڤێجا كەیف و شاھی گەرمتردبن.                              

* دیسا ئەركەكا لسەر برایێ ئاخرەتێ دگەل زاڤای بۆ رێڤەكرنێ دچنە مالا بابێ بوكێ و پێكڤە خوارنەكێ د خۆن.
ھەروەسا جۆرەكی دی یێ برایێ ئاخرەتێ یێ ھەی ، ئەو ژی جارنا ھەكە كچەكێ برایێ دای و باب نەبتن ژ خۆرا برایێ ئاخرەتێ دگرت، كوڕ ژی ھەكە خوشكا ژ دای و باب نەبتن ژ خۆرا خووشكا ئاخرەتێ دگرت ئەڤە ژی بۆ داگرتنا وێ ڤالاتی یا ڤیانا خوشك و برایانە..                                    
  ژێدەر: 

 پەرتۆكێن پەروەردا ئێزدیاتیێ.

مامۆستایێ ئایينی پیر سه‌عید.