"وێنەگرەكێ ئێزدی پتریا سترانێن فلكلۆری یێن چیایێ شنگالێ ئەرشیف كرینە"
ئێزدیخان نیوز:
وێنەگر و رۆژنامەڤانێ گەنجێ ئێزدی"ئیڤان حەجی"خەلكێ كۆمەلگەها خانكێ یە و خودان ئەرشیفەكێ مەزنە،هەتا نهۆ خزمەتەكا مەزن پێشكێشی جڤاكێ ئێزدیان و فلكلۆرێ كوردی كریە.
ئیڤان حەجی،بۆ مالپەرێ(ئێزدیخان نیوز) گۆت:"هەرژ سالا 2001ێ من دەست ب كارێ وێنەگرتێ كریە و هەتا نهۆ لسەر كارێ خۆ بەردەوامم، ل كۆمەلگەها خانكێ من وێنەگری هەیە وپتر ژ (1000) داوەتا وێنەكرینە و گەلەك شارەزایی دئامیرێ كرینێ ئانكو سلنگا وێنەكرنێ دا هەیە،هەتا نهۆ دوو فلم وێنەكرینە ژوانا كۆما (گورگا) ژچەندین ئەكتەرێن كۆمەلگەها خانكێ پێكهاتبوون و فلمێ قوتابخانا پەنابەران ل ئێنیشكێ لدۆر ئاواران،هەروەسا كلیپەكا راپێ لدۆر كارەساتا شنگالێ یا هۆنەرمەند"خودێدا هادی شنگالی" و سترانا فەرمانە یا هەردوو هۆنەرمەندان "عەلی فەقیر خدر" و "تەحسین فەقیر خدر"وێنەكرینە" و شەش پێشانگەهێن فۆتۆگرافی ڤەكرینە و نهۆ ب رێیا كەنالەكیچ یوتوبی ب ناڤێ(خانكێ ڤیدیۆ) رێورەسم و ئاهەنگ و داوەتان بەلاڤ دكەت".
ئەو چەندە ژی دیاركر:"تشتێ هەری گرنگ من پتر ژ (200) دەمژمێرێن سترانێن فلكلۆری یێن چیایێ شنگالێ پێشكێشی ئەرشیفێ بنگەهێ لالش ل دهۆكێ كرینە،هەروەسا گەلەك رێورەسمێن ئایینی وەك تواف و هاتنا گەرا تاوسێ و سەفرا نان و ماستا و جەژنان ب فۆتۆ و ڤیدیۆیێ ب تایبەتی ل لالشا نوورانی و ل خانكێ و شاریا هەنە و گەلەك وێنە ب كوالێتیەكا بلند گرتینە وەك ئەرشیف ل نك منن و گەلەك ژوان پێشكێشی ئەرشیفێ بنگەهێ لالش كرینە و من ئەو هزر كریە ئەگەر جارەكێ ل نك من نەمان دا ل وێدەرێ بێنە پاراستن،دیسان نێزیكی (100) كامیرێن فۆتۆ و ڤیدیۆیێ هەنە و دكەڤن ونوونە ،كامیرا هەرا كچك ژ سەنگێ (5) غرامە و (2)میگا پێكسلە و یا مەزن نێزیكی(10) كیلۆیایە ژوان كامیرێن گەلەك كەڤنن، زێدەباری هندێ ئامیرێن شوشتنا وێنا یێن كەڤن و نوو هەنە و بەردەوام هەول ددەم كامیرێن كەڤن ب دەست خۆ ڤە بینم وەك ئەرشیف".
وێنەگری ئاشكەراكر:"خزمەتا پێشكێش دكەم ژبۆ ئێزدیاتی و رەسەنەتیا مەیە و ب تایبەت فلكلۆرێ مە یێ كوردایەتیێ".
ناڤهاتی دهەمان دەم دا رۆژنامەڤانە و باوەرناما دبلۆمێ ب رۆژنامەڤانێ هەیە و قوتابیێ كولیژا پشكا رۆژنامەڤانیا ئەلكترۆنی یە ل زانكۆیا پۆلیتەكنیكی دهۆك،ئەندامێ سەندیكا رۆژنامەڤانێن كوردستانێ و كۆمەلا وێنەگرێن كوردستانێ لقێ دهۆكێ یە،وێنەگرێ دەستەیا بلندا بنگەهێ لالش ل دهۆكێ یە ل بەشێ ئەرشیفی،دیسان وێنەگرێ كەنالێ كوردستان تی ڤی و پەیامنێرێ رۆژناما دەنگێ لالشە،هەتا نهۆ ب دەهان راپۆرت و نووچە و گۆتار لدۆر رەوشا ئاواران و ئێزدیاتیێ بەلاڤ كرینە.
تعليقات