شێخ شامۆ:ریفراندۆم دێ بتە گرەنتیا چارەنڤیس و مافێ ئێزدیان ل كوردستانێ
تۆرا لالش یا راگەهاندنێ
بەرێز"شێخ شامۆ"سەرۆكێ دەستەیا بلندا بنگەهێ لالش دووپات كر كو پرۆسا ریفراندۆمێ دێ بتە گرەنتیا چارەنڤیس و مافێ ئێزدیا ل كوردستانێ پتر ژ هەر پێكهاتەكی،تەكەزكر ژی نێزیكی 90%ژ ئێزدیان هێشتا گرێدایی حكومەتا بەغدانە ژلایێ ئیداری ڤە،بەلێ پشتی ئەڤە دەڤەر ژ ئالیێ ئیداری ڤە دكەڤنە هەمبێزا كوردستانێ دا هنگێ نوونەراتیا ئێزدیا دێ 15% ژگەلێ كوردستانێ بت.
ژلایەكێ دی ڤە شێخی خویاكر:"بنگەهێ لالش دگەل كارگێریا پارێزگەها دهۆكێ دێ پشكداریێ دساخكرنا بیرەوەرییا سالانە یا كۆمكوژیا ئێزدیان ل شنگالێ دا كت،هەروەسا بیرەوەریێن سالانە ێن كارەساتێن گرعزێر و سیبا شێخدر و كۆچۆ لسەر ئاستێ تایێن لالش و كەمپێن ئاواران،چنكو ساخكرنا وان روودانێن دلتەزین ئەركە ل سەر بنگەهێ لالش و تایان".
ل رێككەفتی 23تەمووزا 2017ێ دكۆمبوونا فەرمی یا بنگەهێ لالش دگەل ئەندامێن دەستەیا بلند و سەرۆكێن تایان،بەرێز"شێخ شامۆ" دووپات كر كو ناما بەرێز"مەسعود بارزانی"بۆ پێكهاتێن كوردستانێ یا رۆنە و حەموو پێكهاتان دێ پاشەرۆژەكا گەش ل كوردستانێ دا هەبت،چنكو كوردستانا دەیك پەناگەها حەموو نەتەوە و مەزهەب و ئایینایە و بنگەهێ پێكڤەژیان و ئاشتیێ یە.
دتەوەرەكێ دی یێ كۆمبوونێ دا پەسنا رۆلێ مەزن یێ بنگەهێ لالش ل ئەلمانیا ئەنجامدایی كر ب رێیا چالاكی و بزاڤێن وان یێن هەمەرەنگ،دووپات كر كو بنگەهێ لالش ل ئەلمانیا بوویە مالەكا رەوشەنبیری بۆ جڤاكێ كوردی ب گشتی و ئێزدیا ب تایبەتی.
هەروەسا دلایەكێ دی دا شێخی بەحس ل سەر گرنگترین سەرەدانێن ل ئەلمانیا ئەنجامداین كر و ژوانا سەرەدانا مالا میر"تەحسین بەگ"بۆ ژ نێزیك ئاگەهداربوون ل سەر رەوشا ساخلەمیا وی و ریفراندۆما چارەنڤیساز یا كوردستانێ و گرنگیا وێ بۆ گرەنتیا پاشەرۆژا ئێزدیا ل كوردستانێ،دووپات كر كو سەماحەتا میری ب هێز پشتەڤانە بۆ ئەنجامدانا ریفراندۆمێ و پشتەڤانیا خۆ بۆ سەركەفتنا پرۆسا ریفرنداۆمێ دەربری.
ل داویا كۆمبوونێ گەنگەشە دناڤبەرا ئەندامان دا هاتە كرن، ل دۆر گرنگترین چالاكی و بزاڤێن بنگەهێ لالش و تایان.
تعليقات