داخواز ژ موسلمانان هاته كرن بەشداريێ د نووژەنکرنا پەرستگەهێن کوردێن ئێزدی و کاکەییان دا بکه‌ن
باسنیوز:
بەرپرسی پێکەوەژیانی ئایینی لە وەزارەتی ئەوقاف و کاروباری ئایینی حکوومەتی ھەرێمی کوردستان، داوا لە موسڵمانانی جیھان و کوردستان دەکات بەشداری لە دروستکردنەوە و نۆژەنکردنەوەی پەرستگە، مەزاری ئێزیدی و کاکەییەکان بکەن، کە لەلایەن ڕێکخراوی داعشەوە تەقێندراونەتەوە یان ڕوخێنراون و سووکایەتیان پێکراوە.
مەریوان نەقشبەندی، بەرپرسی پێکەوەژیانی ئایینی لە وەزارەتی ئەوقاف و کاروباری ئایینی حکوومەتی ھەرێمی کوردستان، بە (باسنیوز)ی ڕاگەیاند: "پاش پڕۆسەی ئازادکردنەوەی ئەو ناوچانەی لەژێر دەسەڵاتی چەکدارانی داعشدا بوون، مەسیحی، کاکەیی و ئێزدییەکان دەیانەوێ ئەو کلێسە، پەرستگە و مەزارە ئایینییانە نۆژەن بکەنەوە کە لەلایەن ئەو ڕێکخراوەوە تەقێندراونەتەوە یان ڕووخێراون و سووکایەتییان پێکراوە".
بەرپرسی پێکەوەژیان، ئەوەشی خستەڕوو: "بەھۆی پشتگیری مادی مەعنەوی زۆری مەسیحییەکانی جیھان پڕۆسەی دروستکردنەوەی کەنیسە و شوێنە ئاینییە مەسیحییەکان و گەڕانەوەی ئاوارە مەسیحییەکان بە باشی بەڕێوەدەچێ، بەڵام کاکەیی و ئێزدییەکان بەھۆی تەنگژەی دارایی حکوومەتی ھەرێمی کوردستان و نەبوونی پشتگیری مادی نێودەوڵەتی بۆ دروستکردنەوەی پەرستگە و مەزارە ئایینییەکانیان، ئێستا خۆیان خۆبەخشانە دەیانەوێت شوێنە ئایینییەکانیان نۆژەن بکەنەوە لە باشیک و بەحزانی و ئەو شوێنانەی پێشمەرگە ئازادی کردوونەتەوە و دەیان پارێزێت".
نەقشبەندی داوا لە دەوڵەمەند و ڕێکخراوە ئیسلامییەکانی جیھان و کوردستان کرد: "بۆ پیشاندانی ئەو ڕاستییەی کە داعش گروپێکی داگیرکەرە و نوێنەرایەتیی ئیسلام ناکات، ھەروەک چۆن بەشداری لە دروستکردنی ھەزاران مزگەوت لە ھەرێمی کوردستان و ناوچە جیاجیاکانی جیھان دەکەن، بە ھەمانشێوە لە پڕۆسەی دروستکردنەوە و نۆژەنکردنەوەی پەرستگە و مەزاری کاکەیی و ئێزدییەکان بەشداری بکەن لە ڕێگەی بەڕێوەبەرایەتیی گشتی کاروباری ئێزدییەکان و لەژێر چاودێری ئەنجومەنی ڕوحانی ئێزدییەکان".
تعليقات