نێچیرڤان بارزانی: پێدڤییه بۆ ریفراندۆما هه‌رێمێ جڤاكا نێڤده‌وله‌تی هاریكاربیت
WAAR-دهۆك:
سه‌رۆكوه‌زیرێن هه‌رێما كوردستانێ د چارچووڤێ كۆمبوونا دگه‌ل وه‌زیرێ ده‌رڤه‌یێ ئه‌لمانیا دا راگه‌هاند؛ خه‌لك و حكومه‌ت و ئالیین سیاسی یێن هه‌رێمێ، ناخوازن ب تۆندوتیژی مافێن خوه بده‌ست بێخن، له‌و پێدڤییه د پرسا ریفراندۆمێ دا، جڤاكا نێڤده‌وله‌تی هاریكاربیت.
ل گۆری مالپه‌رێ حكومه‌تا هه‌رێمێ، ئه‌ڤرۆ سپێدێ نێچیرڤان بارزانی سه‌رۆكوه‌زیرێن هه‌رێمێ، پێشوازی ل زیگمار گابریێل وه‌زیرێ ده‌رڤه‌یێ ئه‌لمانیا و شانده‌كا دگه‌ل دا كرییه و وه‌زیرێ ئه‌لمانی، په‌سنا پێكڤه ژیانا ئۆلی و نه‌ته‌وه‌یی ل هه‌رێمێ كر و سوپاسیا خه‌لك و حكومه‌تا هه‌رێمێ د پێشوازیا وێ ژماره‌یه‌یا مه‌زنا ئاواره‌یان دا كر و به‌رده‌وامییا هاریكاریێن سه‌ربازی و مرۆڤی یێن وه‌لاتێ خوه ژی بۆ هه‌رێمێ پشتراستكر.
وه‌زیرێ ده‌رڤه‌یێ ئه‌لمانیا گۆت ژی: ئه‌و هیڤی خوازن ژ هه‌موو روویان ڤه په‌یوه‌ندیین خوه دگه‌ل هه‌رێمێ پێشڤه‌ببه‌ن و ده‌رباره‌یی په‌یوه‌ندیێن هه‌رێم و به‌غدا گۆت: بۆ چاره‌كرنا كێشه‌یان پێدڤییه دیالۆگ و دانوستاندن بنه‌مایێن سه‌ره‌كی بن، سه‌رۆكوه‌زیرێن هه‌رێمێ ژی گۆت: ژ روویێ سه‌ربازی ڤه هه‌رێم و به‌غدا په‌یوه‌ندیین تۆكمه هه‌نه، لێ ژ روویێن دی ڤه چوو دانوستاندنێن رژد نه‌بووینه و داخوازكر د ڤێ ده‌ربارێ دا جڤاكا نێڤده‌وله‌تی رۆلێ خوه ببینیت.
ده‌رباره‌یی ریفراندۆما سه‌رخوه‌بوونا هه‌رێمێ ژی، نێچیرڤان بارزانی دیاركر، ریفراندۆم مافه‌كێ سرۆشتیێ گه‌لێ مه‌یه، لێ خه‌لك و حكومه‌ت و ئالیین سیاسی یێن هه‌رێمێ، ناخوازن ب تۆندوتیژی وی مافی بده‌ست خوه‌ڤه بینن، له‌و پێدڤییه د پرسا ریفراندۆمێ دا، جڤاكا نێڤده‌وله‌تی هاریكاربیت.
تعليقات