میرێ ئێزدیان :چارەنڤیسا كوردێن ئێزدی چارەنڤیسا خەلكێ كوردستانێ یە

میر تەحسین بەگ میرێ ئێزدیان ل كوردستانێ و جیهانێ بو خەبات:

- مە وەكو مالا میرێت ئێزدیا دیروكەكا دێرین دگەل مالا بارزان هەیە.... 

- بازانیێ نەمر دەمێ ئەز دزیندانێدا ل بەغدا سەرەدانا من كر وبزاڤا ئازادكرنا من ژ (عبد الكریم قاسم)ی كر - ئەز سەرا كوردینیێ دوو جارا هاتمە زیندان كرن.... 

- چارەنڤیسا كوردێن ئێزدی چارەنڤیسا خەلكێ كوردستانێ یە.... 

- بارزانیێ نەمر كەسەكێ دلوڤان و نیشتیمان پەروەر بو.... 

- سەرۆك بارزانی جهێ رێزگرتنێ یە بو هەمی پێكهاتێن كوردستانێ یە.... 

- ل (1945)ێ بارزانیێ نەمر هاتە مرێبا دا پێكڤە چینە شنگالێ.... 

دیدار / حەكیم حیكمەت 

میر تەحسین سعید بەگ میرێ ئێزدیان و سەرۆكێ ئەنجومەنێ روحانی كوردێت ئێزدی ل دور بیرەوەریێن خۆ دگەل بارزانیێ نەمر گوت: میر تەحسین بەگ دیار كر كو ل سالا 1959 ێ من و مەلا مستەفایێ بارزانی دیت بو دەمێ ژ روسیا هاتی ئێكەمین كەس ل پێشیا هەمیا پێشوازی ل بارزانیێ نەمر كری ل فروكخانا بەغدا ومن سلاڤ لێ كر و ئەز دگەل مەلا مستەفایێ بارزانی مام تاكو چووینە ئوتێلا سەمیر ئەمیس ل بەغدا و صادق برازایێ بارزانی كورێ شێخ بابو دگەلدا بو و ئەز بەردەوام دگەل بووم. 

میر تەحسین سعید بەگ دیار كر كو وەك مالا میرێن ئێزدیا دیروكەكا دێرین مە دگەل مالا بارزان هەیە و هەمی دەما ئەم دگەل مللەتێ خۆ بووین و دەمێ ئەز نەفی كریمە عمارە و پاشی بەغدا و ئەز زیندان كریم دەمێ بارزانیێ نەمر ژ روسیا زڤری پرسیارا من كر هەڤالا گۆتێ میر تەحسین بابێ سەعیدی یێت زیندانێ دا دەملدەست بارزانیێ نەمر هاتە دەف من ل زیندانێ و دگەل بارزانی ئیبراهیم ئەحمەد و حەمزە عبد الله وهندەك هەڤالێن دی بوون سەرەدانا من كرن ل زیندانێدا ل بەغدا و بارزانیێ نەمر گۆتە من میر خێرە تو گرتی و زیندان كرین من گۆتێ سەرا كوردینیێ یە و بارزانیێ نەمر گۆت سوباهی دێ (عبد الكریم قاسم) بینم و دبێژمێ تە ئازاد بكەن ومن گۆتە جەنابێ بارزانی هەوجە ناكەت تو بێژیە (عبد الكریم قاسم) ی لێ بارزانیێ نەمر ئەمر كر كو دگەل (عبد الكریم قاسم)ی باخڤم بو ئازاد كرنا تە من گۆتە بارزانیێ نەمر ئەگەر تو بێژیێ دێ خرابتر لمن دكەت من گۆتە بارزانی ئەز ژ بەر تە زیندان كریمە من چ كار نە كرینە دگەل وان و دەمێ ئەز دگەل كوردستانێ و مللەتێ خۆ و دگەل هەوە ئەز سەرا وێ گرتیمە دەمێ بارزانیێ نەمر گۆتە (عبد الكریم قاسم) ی ل رۆژا دی ئەز ژ زیندانا بەغدا ڤەگوهاستیمە دیوانیێ. 

میر تەحسین بەگ ئاماژە كرە وێ ئێكێ دەمێ بوویە شەر ل سالا (1961)ێ ئەم دگەل كوردستانێ بووین و ئەم دگەل بارزانیێ نەمر بووین و برایێ من خەیری بەگ و جەلال بەگ دگەل كوردستانێ بوون و تەندروستیا من باش نەبو ئەز چوومە لەندەن ل سالا (1963)ێ ومن گۆتە مللەتێ مە كوردێن ئێزدی دگەل كوردستانێ بن چارەنڤیسێ مە ئێكە دگەل كوردستانێ ومن گۆتە مللەتێ مە پشتەڤانیا كوردستانێ و پێشمەگەی بكەن. 

میر تەحسین بەگ گۆت بریارا گرتنا من هەبو ئەڤ بریارە رابو ئەز زڤریمە عیراقێ، ئەز ل بەغدا بووم بەرێز صالح یوسڤی هاتە نك من و گۆت بارزانیێ نەمر سلاڤ بو تە هەنە وپێدڤیە تو ئامادەبی ل كومبوونا كویێ من گۆت سەر چاڤا ئەز رابووم رۆژا دی ئەز چوومە كەركوكێ دا بچمە كویێ ب رێكێ ڤە من قائید فرقە (فیصل ئەنساری) دیت و دوستێ من بو من گۆتە وی ئەز دچمە خزمەتا بارزانی چونكو وی دەمی دان و ستاندن هەبو و قائید فرقە (فیصل ئەنساری) گۆتە من من داخازیەكا هەی بگەهینە جەنابێ بارزانی و ئەز دزانم بارزانی رێزێ ل تە دگریت من گۆتێ كەرەمكە، قائید فرقەی گوتە من ئەفسەرەك و (4) سەرباز پێشمەرگەی گرتینە من دڤێت ئەو بهێنە ئازاد كرن ومن گۆتی ئەمانەت دێ گەهینمە بارزانیێ نەمر، ئەز چوومە وێرێ ئەم ل مالا حەمەد زیاد بووین كو بارزانی ل وێرێ بو و مالا برەخ ڤە فەرهاد غابات بو گۆتە من میر كەرەمكە تو مێهڤانێ مە یی دەنگ چوو بارزانی و بارزانیێ نەمر ئەمر كر كو میر مێهڤانێ منە هەمیا ببە دەف خو میری نە بەن، من گۆتە بارزانیێ نەمر دلێ تەیە ئەم رونشتین هەتا دەم ژمێر (10)ێ شەڤێ دگەل هەڤالا هەمیا خاترا خو خاستن و چوون، ئەز و بارزانی ماین، بارزانی گۆت ژورێ بو من و میری حازر كەن، تەختەك هەبو یێ عادی بو یێ بارزانی بۆ، مەلا مستەفای گۆتە من بابێ سەعیدی كەرمكە سەر تەختی من گۆتی جهێ تەیە، بارزانی گۆتە من ناچێبیت كەرمكە سەر تەختی و ئەز دێ ل عەردی مینم و رێز لمن گرت و هاتا (2) دووێ شەڤێ مە سوحبەت كرن و بارزانی نەد نڤست و هەر یێ هشیار بو، من بەحسا رەوشا مللەتی و كوردستانێ و سەرەدانا من یا لەندەن كر و بارزانی گەلەك رێز لمن گرت و دوو جارا كەتمە ل زیندانێ دا هێز بو من د هنارت ومن گوتە بارزانیێ نەمر من (فیصل ئەنساری) دیت قائید فرقە و گوتبو من ئەڤسەرەك و (4) سەرباز گرتینە لنك پێشمەرگەی، ئەگەر جەنابێ بارزانی وان ئازاد بكەت و گوتبو من بارزانی رێزێ ل ئاخفتنا تە دگریت و بارزانیێ نەمر ئەمر كر كو بهێنە ئازاد كرن و هەر دوێ رۆژێدا و سەحارێ ئەز رابووم من گۆت كا مەلا مستەفا گۆتن نە یێ حازرە، مە تێشتا سەحارێ خار پشتی هنگی ئەنوەر بەگ یێ بتواتەی هاتە وێرێ من گۆتە ئەنوەری كا بارزانی گۆتە من چوویە چیای وب تڕۆمبێلا ئەنوەری جێب بو ئەم سیار بووین و چووینە چیای دەف بارزانی و بارزانی نڤست بو من نەهێلا بنڤیت ومن گۆتە بارزانی رابە دا بخۆ باخڤین، رۆژا دی كومبوونەك چێبو ل جامعا مەزن ل كوێسنجەق و هەمی هەڤال تێدا بوون ئیبراهیم ئەحمەد و جەلال تەلەبانی و ل وی دەمی چ خیلاف نەبوون و هەمی سەرۆك هوز ژ زاخۆ تا خانەقین ئامادەبوون و یێت مە ژی برایێ من جەلال بەگ و صالح نەرمو لوێ كومبوونێ لیژنەیەك پێك ئینا بو دان و ستاندنا دگەل بەغدا و دوێ لێژنێدا ناڤێ جەلال تەلەبانی و هاشمی و برادەرا گۆت دڤێت میر ژی دگەل بیت و ناڤێ من ژی هات دگەل لیژنێ بم لێ من گۆتە بارزانی من عەفو كە ئەز نا چم و بارزانی گۆتە من میر دلێ تەیە و صالح یوسڤی و جەلال تەلەبانی چوونە بەغدا و تەعدا لێ هاتە كرن و جەلال تەلەبانی خۆ خلاص كر لێ یێت دی هاتنە ئەعدام كرن. 

مێر تەحسین بەگ دیار دكەت هەر ل سالا (1945)ێ پەیوەندیێت مە وەكو مالا میرێت ئیزدیا دگەل مالا بارزان هەیە و ل سالا (1945)ێ بارزانیێ نەمر هاتە دەڤەرێ و گەهشتە مرێبا مللەتێ مە هەمی ل پێشوازیێ بو چونكو ئەز و بارزانیێ نەمر دا چینە شنگالێ و لوی دەمی نامە بو بارزانی هات كو وەلی بەگ هاتە گوشتن و شێخ ئەحمەدی گۆتە بارزانی بزڤرە و بارزانیێ نەمر گۆتە من ئەز دێ زڤرم. 

میر تەحسین بەگ گۆت پەیوەندیێن مە گەلەك دیرینن دگەل كوردستانێ چونكو چارەنڤیسێ مە ئێكە لێ مە هندەك داخازیێن ئیزدیا هەنە ول كوردستانێ چارە دكەین.