پەنابەرێن ئێزدی ل ئەلمانیا دێ دەست ب خۆپیشاندانان كەن
ئێزدیخان نیوز:ئەلمانیا
سبەی ل باژێرێ هانۆڤەر ل ئەلمانیا،پەنابەریێن ئێزدی دێ دەست ب خۆپیشاندانێ كەن.
ل گۆر پێزانینێن ب دەست مالپەرێ(ئێزدیخان نیوز)كەفتین،سبەی رۆژا شەمبوویێ رێككەفتی 11/2/2017ێ و ل دەمژمێر 12ی نیڤرۆ،پەنابەرێن ئێزدی دێ دەست ب خۆپیشاندانێ ل باژێرێ هانۆڤەر كەن،ئەڤ خۆپیشاندان دێ ژ شتایتور هانۆڤەر دەست پێ كەت هەتا دگەهتە پەرلەمانێ وێ دەڤەرێ،كو پێشبینی دئێتە كرن پتر ژ هەزار كەسان پشكداربن.
دڤێ خۆپیشاندانێ دا چەندین دروشم دێ ئێنە بلندكرن،ژبۆ ئێزدیاتیێ و مافێ پەنابەریێ و رەتكرنا داخوازیێن پەنابەریێ ل ئەلمانیا و دەرێخستنا خێزانێن ئێزدی بۆ بولگاریا و یۆنانێ.
هەروەسا پەنابەرێن ئێزدی دێ نەرازیبوونێ پێشكێشی پەرلەمانێ ئەلمانی و دادگەها پەنابەریێ كەن.
هەر دڤێ خۆپیشاندانێ دا دێ داخواز دانپێدانێ ب جینۆسایدا ئێزدیان و پێدانا مافێ پەنابەریێ بۆ هەموو ئێزدیان ئێتە كرن.
ئەڤە ماوێ هەیڤەكێ یە دەزگەهێن پەنابەریێ ل ئەلمانیا رەتكرنێ ددەن پەنابەرێن ئێزدی،ڤێ یەكێ پەنابەرێن ئێزدی نیگەران كرینە كو چارەنڤیسێ وان ئێخستیە دمەترسیێ دا،پشتی ب چەندین ریێن مرنێ خۆ گەهاندین و وەلاتی ئەو دترسن بێنەڤەگەراندن بۆ وەلاتێ خۆ.
تعليقات