ئێزديخان نيوز:
رێڤەبەرێ كاروبارێن ئێزدیان ل پارێزگەها دهۆكێ دیاركر پتر ژ 150 كچێن كوردێن ئێزدی یێن ژ دەستێن رێكخراوا تیرۆرستی داعش رزگار بوونە، ژیانا هەڤژینێ پێكئێنانە. گەلەك گەنجێن ئێزدیان چاڤەرینە كچێن رزگاربوویی رازی بن شوو پێ بكەن، ناڤێن خوە ل رێڤەبەریا كاروبارێن ئێزدیان تۆمار دكەن.
هادی دوبانی، رێڤەبەری كاروبارێن ئێزدیان ل پارێزگەها دهۆكێ بۆ (باسنیوز) دیاركر دەمێ كچەك ژ دەستێن تیرۆرستان رزگار دبیت ئێزدی ل پەرستگەها لالش رێ و رەسمێن تایبەت ئاینی بۆ وێ دگێرن، پێشوازی ل كچێن خوە دكەن. هەتا نوكە گەلەك كچ رزگاربووینە باشترێن شیوە پێشوازی ل وان یا هاتیە كرن ژلایێ كەس و كارێن وان و جڤاتا روحانیا ئێزدیان ڤە.
دوبانی خۆیا ژی كر تیرۆرستێن داعش ب غەدر كچێن ئێزدیان رەڤاندن، دووڤ بریارا جڤاتا روحانیا ئێزدیان هەموو ئێزدیان دەرگەهێن مالێن خوە ڤەكرن بۆ ڤەحەواندن و پێشوازیا كچێن رزگار دبن. دەمێ رزگار ژی دبن شەهیانێن خوە ب كەیف و خوشی دكەن. ئەڤە مەزنترین بەرسڤە بۆ دوژمنێ مروڤایەتیی. ب سەدان گەنجێن ئێزدیان بەرهەڤن ژیانا هەڤژینیێ دگەل كچێن رزگاربوویی پێك بینن.
زێدەتر گۆتژی:" ب پشتەڤانیا حوكمەتا هەرێما كوردستانێ بەردەوام كار دهێتە كرن بۆ خۆشكرنا ژیانا كەسێن رزگار دبن ژ دەستێ داعش و بەردەوام كار دهێتە كرن هەموو رەڤاندی بهێنە رزگار كرن. نڤیسینگەها كاروبارین رەڤاندیان باشترین شیوە خزمەتان دگەهینتە كەسین رزگاربوویی".
