unخوارنێن ئێكسپاير ل سه‌ر ئاوارێن ئێزدى به‌لاڤ كرينه
ئێزديخان نيوز:
وه‌لاتییه‌كێ ئێزدی یێ ئاكنجیێ كه‌مپا نه‌ورۆز ل باژێڕێ دێركێ ل رۆژئاڤا كوردستانێ خویاكر كو؛ "نێزیكی 450 مالێن ئێزدی ل ڤێ كه‌مپێ هه‌نه و ره‌وشا وان باشه، لێ ئه‌ڤه بۆ ماوه‌یێ 6 مه‌هانه UN خوارن ب سه‌ر وان دا به‌لاڤ نه‌كرییه و مه‌هه‌كێ ژی هنده‌ك خوارنێن ئێكسپایر لسه‌ر به‌لاڤ كربوو".
ئه‌ڤ وه‌لاتیێ ئێزدی یێ ئاكنجی ل كه‌مپه‌كێ ل رۆژئاڤا كوردستانێ نه‌ڤیا ناڤێ وی دیار بكه‌ین بۆ دواڕۆژ گۆت: "ئه‌گه‌ر ماله‌كێ بڤێت بچیته چیایێ شنگالێ پێشتر رێك دهاته‌دان و نێزیكی 50 مال چۆینه وێری و ب ترومبێلێ 2.5 ده‌مژمێران ژ ڤێ كه‌مپێ دووره، لێ نوكه رێك ناهێته‌دان".
ئه‌ڤ وه‌لاتیێ ئێزدی زه‌لالكر كو؛ "هه‌ر ژ ده‌ستپێكا كه‌ڤتنا شنگالێ هه‌تا نوكه نێزیكی 300 ژن و زارۆكێن مه ژ ده‌ستێ داعش ره‌ڤینه و گه‌هشتینه ڤێ كه‌مپێ، لێ هێشتا د ده‌ستێ وان دا ماینه و پترییا وان ژی ل باژێڕێ ره‌قه‌نه".
وه‌لاتیێ ئاكنجیێ كه‌مپا نه‌ورۆز ل رۆژئاڤا كوردستانێ خویاكر كو؛ "به‌شه‌كێ كێم ژ ئێزدیێن ئاكنجیێن ڤێ كه‌مپێ گه‌هشتینه رێزێن یه‌كینه‌یێن پاراستنا گه‌ل یه‌په‌گێ و دژی داعش و هێزێن دی یێن دژه‌كورد شه‌ڕی دكه‌ن".
ڤی وه‌لاتی ئاماژه ب هندێ داكو؛ "حه‌ز دكه‌ین حوكمه‌تا هه‌رێمێ و یه‌كینه‌یێن پاراستنا گه‌ل بۆ رزگاركرنا كچ و ژنێن مه ژ ده‌ستێ داعش په‌یوه‌ندی دگه‌ل ئێك هه‌بن، هه‌ر چه‌نده جاران بۆ ڤێ مه‌ره‌مێ ژ نڤیسینگه‌ها ره‌ڤاندیێن داعش ل دهۆكێ هنده‌ك كار دهێنه‌كرن لێ كێمه، ئاماژه ب هندێ داكو لڤێره ئاڤ و كه‌هره‌ب هه‌یه لێ د بابه‌تێن ساخله‌می و خوارنێ دا جاران كێشه بۆ مه په‌یدا دبن، هه‌تا نوكه ژی چو هاریكاریێن حوكمه‌تا هه‌رێمێ نه‌گه‌هشتینه ڤێ كه‌مپێ".
مه‌حما خه‌لیل ده‌ڤه‌ردارێ شنگالێ بۆ دواڕۆژ زه‌لالكر كو؛ "هه‌تا نوكه 150 خێزانێن ئێزدی ژ كه‌مپا نه‌ورۆز و ب شێوه‌یه‌كێ گشتی ژ رۆژئاڤا كوردستانێ هاتینه هه‌رێما كوردستانێ و لژنه‌یه‌كا تایبه‌ت پێشوازی ل وان كرییه و هه‌موو پێنگاڤێن پێدڤی هاتینه هاڤێشتن، پشتی ئاكنجیكرنێ ژی هه‌موو پێدڤیێن وان یێن ژیارێ ژلایێ حوكمه‌تا هه‌رێمێ ڤه هاتینه دابینكرن و ژنها وێڤه‌ژی هه‌ر خێزانه‌كا بهێت هه‌ر ب ڤی ره‌نگی دێ سه‌ره‌ده‌ری دگه‌ل هێته‌كرن".
مه‌حما خه‌لیل ئاماژه ب هندێ داكو؛ "ئه‌ڤ 450 مالێن ئێزدی كو چۆینه رۆژئاڤا كوردستانێ ب ره‌زامه‌ندییا خوه ئه‌و جهـ هه‌لبژارتییه، مه ژی چو پێزانین لسه‌ر ره‌وشا وان نینه كا ئایا ژیارا وان چه‌وایه؟ پێدڤی ب چ هه‌نه؟ لێ د بابه‌تێ رزگاركرنا كچ و ژنێن ئێزدی یێن د ده‌ست داعش دا چو جوداهییه‌ك مابه‌ینا وان و ئێزدیێن ناڤا هه‌رێمێ دا نینه و كار بۆ رزگاركرنا كچ و ژنێن ئێزدی یێن كه‌سوكارێن وان ل رۆژئاڤا كوردستانێ ژی دهێته‌كرن".
حسێن كورۆ رێڤه‌به‌رێ نڤیسینگه‌ها ره‌ڤاندیێن ده‌ستێ داعش بۆ دواڕۆژ زه‌لالكر؛ "ب شێوه‌یه‌كێ فه‌رمی مه چو په‌یوه‌ندی دگه‌ل یه‌كینه‌یێن پاراستنا گه‌ل بۆ هاریكاریكرنا ئێزدییان لناڤا كه‌مپا نه‌ورۆز ل رۆژئاڤا كوردستانێ نینن، لێ په‌یوه‌ندیێن مه لسه‌ر ئاستێ كه‌سینه و تا رادده‌یه‌كێ مه ئاگه‌هـ ژ ره‌وا وان هه‌یه، لێ بۆ هاریكاریكرنا وان ژلایێ خوارنێ ڤه و رزگاركرنا گرتیێن وان ژ ده‌ست داعش ب شێوه‌یه‌كێ فه‌رمی چو په‌یوه‌ندی مابه‌ینا حوكمه‌تا هه‌رێمێ و یه‌په‌گێ دا نینن".
رێڤه‌به‌رێ نڤیسینگه‌ها كاروبارێن ره‌ڤاندییان ئاماژه ب هندێ داكو؛ "ل رێكه‌فتی 3ی ته‌باخا 2014ێ كو شنگال كه‌فته ده‌ست داعش، وێ رۆژێ نێزیكی 1200 كه‌س بوونه جان گۆری، هه‌روه‌سا 6404 كه‌س ژی كه‌ڤتن ده‌ستێن وان كو 3538 ژ وان مێنه و 2866 نێرن، پاشی ل بازارێن نه‌خاسمه ژن و كچ ب شێوه‌یه‌كێ ئاشكرا هاتنه فرۆشتن، هه‌روه‌سا نێزیكی 340 هزار كه‌س ژی ژ شنگالێ كۆچبه‌ر بوو و نێزیكی 60 هزار كه‌سێن دی ژی ژ باشووك و به‌حزان و ده ڤه‌رێن دی كۆچبه‌ر بوون، هه‌ژماره‌ك ژ وان به‌ر ب سووریا، توركیا چۆن و رێژه‌یا هه‌ری مه‌زن ژی بۆ هه‌رێما كوردستانێ هاته ره‌وانه‌كرن، كو ب راستی ژی یا حكومه‌ت و خه‌لكێ هه‌رێمێ جهێ رێز و ڤیانێ یه".
