كارەساتا شنگالێ دمەحفەلێن نێڤ دەولەتی دا...و ئەنجام!
بەختیار قادر
كارەسات و كۆمكوژیا ل 3ی ئابا 2014ێ ب سەرێ خەلكێ شنگالێ دا هاتی ژبال توندرەوترین و درەندەترین رێكخراوا تیرۆرستی ل جیهانێ(داعش)،كو ب سەدان خەلكێ بێ گونەه هاتە كوشتن و ب هەزاران هاتن گرتن و ئاواربوون،هێشتا چەند دەڤەرێن باشوورێ شنگالێ ل ژێر دەستێ تیرۆرستان دا ماینە و نەهاتینە رزگاركرن،كو 3/8/2016دبتە سالا دوویێ ل سەر كارەساتێ،هێشتا چارەنڤیسێ ب هەزاران كچ و ژن و زارۆك و زەلامێن ئێزدی دیار نینە.
ئەڤ كارەساتە ب سەرێ خەلكێ شنگالێ دا هاتی،بوو ئەگەرێ ئاوارەبوونا ب هەزاران خەلكی بۆ دەڤەرێن هەرێما كوردستانێ و كۆچبەربوونا ب هەزاران بۆ وەلاتێن ئەوروپی،ژ پێخەمەت گەهاندنا دەنگ و دۆزا ئێزدیان بۆ جیهانێ،چەندەها سازی و كەسایەتی و چالاكڤانێن ئێزدی چ ب رێیا داخوازنامەیێن فەرمی یان رێكخراوان یان ب پێكۆلێن كەسایەتی پشكداری دكۆنگرە و مەحفەلێن نێڤ دەولەتی دا كرن،ئەڤ یەك پێنگاڤەكە هەری گرنگ بوو،كو جڤاكێ نێڤ دەولەتی پتر ئاگەهداری رەوشا ئێزدیان بت و ب هانەیا وان بێتن،دگەل نێزیكبوونا بیرەوەریا كارەساتێ كو دكەفتە 3/8/206هەتا نۆكە ئێزدی چاڤەریێ ئەنجامانن،كو چ بۆ ئێزدیان هاتیە كرن و دێ ئێتە كرن و چارەنڤیسێ وان بەرەف چ قۆناخێ ڤە دچت.
ل سەر وان هەموو سازی و كەسایەتی و چالاكڤانێن ئێزدی یێن كار ل سەر دۆزەیا ئێزدیان كرین،پێتڤیە ل رۆژا بیرەوەریا كارەساتێ بۆ رایا گشتی یا ئێزدیان ئەنجامێن پشكداری و سەرەدانێن خۆ رابگەهینن ل دۆر داوی گەهشتێن وان دبیاڤێن جودا جودا ل دۆر دۆزەیێ،دبینم ئەگەر ئەڤ یەك نەئێتە كرن تاكێ ئێزدی ئێدی دێ بێ هیڤی بت ژ هەر لایەنەكی یان كەسانەكێ ل سەر دۆزا ئێزدیان ل سەر ئاستێ نێڤ دەولەتی كار دكەتن.
