التخطي إلى المحتوى الرئيسي
بحث هذه المدونة الإلكترونية
نامەیا ماستەرا قوتابیەكا ئێزدی دبتە پەرتووك
ئێزديخان نيوز:
پشتی قوتابیا ئێزدی انتصار نەجیب جوقی،ل (3/11/2013)ێ ل زانكۆیا زاخۆ پشكا زمانێ كوردی ل ماستەرێ هاتیە وەرگرتن، ل رێككەڤتی (11/10/2015) نامەیا خۆ تەمام دكت و باوەرناما ماستەرێ ب پلەیا زۆرباشا بلند پێ دئێتە بەخشین.
انتصار نەجیب جوقی،بۆ تۆرا لالش یا راگەهاندنێ گۆت:"ژبۆ دەولەمەندكرنا پەرتوكخانا كوردی و خزمەتكرنا خوندەڤانێ كورد و ب تایبەت یێ دەڤەرا بەهدینان؛ل گۆرەی داخوازا (موئەیەد تەیب) ئەڤ نامە لگەل زێدەكرنا تەوەرەكی ژ پشكا پراكتیك دبتە پەرتوك ل ژێر ناڤێ (شعر و مێژوو – پراكتیزەكرنا میتودا رەخنا مێژوویی لسەر هۆزانا نوو یا كوردی ل دەڤەرا بەهدینان (1970-1991))، و دەزگەها (سپیرێز) چاپ و بەلاڤكرنا ئەڤێ پەرتوكێ ب ئەركێ خۆ زانیە و ئێخستیە بەر دەستێ خوندەڤانان".
ڤێ قوتابیا ئێزدی ئاماژەكر،پەرتووك ژ سێ پشكان پێك دئێت، بەشێ ئێكێ و دووێ تیۆری یە كو تێدا تێر و تەسەلێن میتۆدا رەخنا مێژوویی شلۆڤەكریە و پشكا سێیێ پراكتیكە، كو تێدا میتۆدا رەخنا مێژوویی ل سەر هندەك ژ هۆزانڤانێن ناڤدارێن دەڤەرا بەهدینان پراكتیكریە مینا تێكستێن هۆزانڤان (بەدرخان سندی، موئەیەد تەیب، رێكێش ئامێدی، مەحسن قۆچان، فەیسەل مستەفا، خەلیل دهۆكی و سەلمان كۆڤلی)،ب دیتنەكا مێژوویی هۆزانێن ئەڤان هۆزانڤانان هاتینە شلۆڤەكرن و ل گۆرەی بوویەر و بەلگەنامێن مێژوویی كۆد و جەڤەنگێن هۆزانان هاتینە ڤەكرن، ژبەركو ئەڤ هۆزان دپر بوون ژ هێمایان ئەڤەژی ژبۆ ئەوێ سانسۆرا ئەوی دەمی دزڤرت ئەوا ل سەر ژیانا كوردان و تێكستێن كوردی ب تایبەتی هەیی.
هەژی ئاماژێ یە ئەڤ هێما نەبووینە ئەگەرێ شێواندن و ئالۆزكرنا هۆزانان،بەلكو بەرۆڤاژی هۆزان پتر جوان و خۆش كرینە و خوندەڤان چێژەكا رادەبەر ژێ وەردگرت،دئەنجامێن ئەڤێ پەرتوكێدا خۆیا بوویە كو بوویەرێن مێژوویی كارتێكرن ل گشت ئەڤان هۆزانڤانان كریە و دناڤا هۆزانێن واندا رەنگڤەدایە، كو دەربرین ژ خەبات و بەرخودان و حەز و ئازادیا نەتەوا كورد كریە،ناڤەرۆكا هۆزانێن وان وێنێن ژیانا كوردان و زولم و زۆرداری و ستەما رژێما بەعس وێنەكریە.
