قوتابیێن سەرکەفتیێن ئێکێ ل سەر ئاستێ قوتابخانێن شاریا هاتن خەلاتکرن

ئێزديخان نيوز:

ل ژێر دروشمێ ( قوتابی سەرکردێن پاشەرۆژێنە ) ول ژێر چاڤدێریا "شێخ شامۆ"  ئەندامێ پەرله‌مانێ کوردستانێ و سەرۆکێ دەستەیا بلندا بنگەهێ لالش ل دهۆکێ، ل رێككه‌فتى 23/6/2016ئاهەنگەکا رێزلێنانێ بۆ 29 قوتابیێن سەرکەفتیێن ئێکێ ل سەر ئاستێ قوتابخانێن کؤمەلگەها شاریا هاته‌ سازكرن.

دلگه‌ش سه‌ليم، سه‌رۆكێ بنگه‌هێ لالش تايێ شاريا دياركر:ب ئامادەبوونا هژمارەکا زۆر ژ بەرپرسێن حزبی وحکومی ورەشەنبیر وریه سپی و قوتابی ومامؤستا وسەمیانێن قوتابیان،بنگەهێ لالش تایێ شاریا  رابوو ب گێرانا  ئاهەنگەکا رێزلێنانێ بۆ 29 قوتابیێن سەرکەفتیێن ئێکێ ل سەر ئاستێ قوتابخانێن کؤمەلگەهێ ل هۆلا لالش ئێك،پشتی خۆله‌كه‌كا رێزگرتنێ بۆ گیانێ پاکێ شەهید وجانگوریێن کوردستانێ رێ وره‌سمێن ئاهەنگێ دەست پێکرن ،ل دەستپێکێ من دپه‌يڤه‌كێ دا بخێرهاتنا مێهڤانان کر و بەحسێ گرنگیا رۆلێ مامۆستا وقوتابیان دئاڤاکرنا وەلاتیدە بلند نرخاند ودووپاتی ل وێ یەکێ کر کو رۆلێ مامۆستا وقوتابیان مینا رۆلێ هەرپێشمەرگەيه‌کییە دچەپەرێن شەرا دا ب دژی دووژمنان خەبات کرییە ، هەروەسا داکوکی ل وێ یەکێ ژى كر کو گرنگی دان وپشتەڤانیکرنا قوتابیان ئەرکەکی پیرۆزە ودکەفتە سەرملێن مە هەموويان ،ژبەرکو ئەو بشکوژین پاشەرۆژێنە بۆ گەل و وەلاتی، پاشی" شێخ شامۆ" ئەندامێ پەرله‌مانێ کوردستانێ و سەرۆکێ دەستەیا بلندا بنگەهێ لالش پەیڤەک خووند و د پەیڤا خۆدا داخویا کرن ئەرکێ بنگەهێ لالشە ئاهنگێن رێزلێنانێ بۆ قوتابیان بگێرە ورێزێ ل چالاکیا وان بگرت وبەردوام پشتەڤانیا وان بکت ،تەکەز ل وێ چەندێ ژی کر کو ئیرۆ رۆژ ب هەبوونا کوردستانەکا ئازاد و ب پشتەڤانیا سەرۆک بارزانی وپێشمەرگه‌یێن قاره‌مانیێن کوردستانێ دجەرگێ ڤێ هەرێمێ دا تەڤایا دەڤەرێن ئێزدیان ب ئارامی وسەرفەرازی ژیانا خۆ دبه‌نە سەر و لتەڤایا دام ودەزگەهێن حزبی وحکومی و رەوشەنبیری رۆلەکێ گرنگ وبەرچاڤ دگێرن.

ناڤهاتى گۆتژى هەروەسا پەیڤا"عبداللە حه‌سه‌ن"رێڤەبەرێ پەروەردا سێمێلێ هاتە پێشکێشکرن وپاشی باوەرنامێن رێز لێنانێ دگەل چەندین خەلاتان ل سەر قوتابیێن سەرکەفتیێن ئێکێ،کو ل سەر ئاستێ 9 قوتابخانێن ئامادەيی وبنەره‌ت یێن کۆمەلگەها شاریا هاتن پارڤەکرن.