ميديا جيهانى كاريگه‌ريا خۆ ل سه‌ر كاره‌ساتا ئێزديان هه‌يه
ئێزديخان نيوز:
به‌ختيار قادر
فه‌رمانا 74يا ب سه‌رێ ئێزديان هاتى ل سه‌ر ده‌ستێ تيرۆرستێن داعشێ ب مه‌زنترين فه‌رمان د ديرۆكێ دا دئێته هژمارتن،ژبه‌ركو زيانێن مه‌زن ب ئێزديان كه‌فتن،ب تايبه‌ت گرتنا كچ و ژن و زارۆكان،ڤێ فه‌رمانێ ل سه‌ر ئاستێ نێڤ ده‌وله‌تى ده‌نگ ڤه‌دايه،ميديايا جيهانى ژى بگره ژ رۆژنامه و مالپه‌ران چه‌ندين راپۆرت ل سه‌ر كاره‌ساتێ چێكرينه و كاريگه‌ريا خۆ هه‌بوويه كو قه‌بارێ كاره‌ساتێ بۆ هه‌موو جيهانێ دايه دياركرن،ئه‌ڤ يه‌ك ژى پێنگاڤه‌كه هه‌رى باش بوو هاتى كرن،سه‌ره‌راى هندێ هێشتا چالاكڤان و رۆژنامه‌ڤانێن ئێزدى ب دروستى ئازارێن ئێزديان نه‌گه‌هاندينه ڤێ ميديايێ،ئه‌وا كو رۆلێ خۆ هه‌ى و فشارێ ل سه‌ر جهێن برياردانێ دكه‌ت،ئه‌رێ بۆچى نكارينه ميديايا جيهانێ ل هاوارا ئێزديان بينن.
كاره‌ساتا ئێزديان جيهان هه‌موو هه‌ژاند،ژبه‌ر وان تاوانێن دژى مرۆڤايه‌تيێ يێن درنده‌يێن داعشێ ل دژى ئێزديان ئه‌نجامداين،بوويه‌رێن كاره‌ساتێ تاراده‌يه‌كى ب پێكۆلێن رۆژنامه‌ڤانێن ئێزدى و راگه‌هاندنا كوردى ده‌مێ رۆمالكرين گه‌هشتنه راگه‌هاندن و ميديا يا جيهانێ كو چه‌ندين راپۆرت ل سه‌ر كاره‌ساتێ به‌لاڤكرن،ئه‌ڤه پێنگاڤه‌كه باش بوو كو جيهان پتر ئاگه‌هدارى ره‌وشا ئێزديان ب گشتى بوو،پشتى بۆرينا ساله‌ك و نيڤا ل سه‌ر كۆمكوژيێ هێشتا ب هه‌زاران گرتيێن ئێزدى د ده‌ستێ داعشێ دانه،دبينم راگه‌هاندنا جيهانێ كێم ته‌رخه‌مبوويه كو فشارێ ل رێكخراوێن مافێ مرۆڤى و وه‌لاتێن زلهێزبكه‌ت كو ب جدى كار ل سه‌ر ئازادكرنا گرتييان بكه‌ن،چنكو ب رێيا ئۆپه‌راسيۆنێن تايبه‌ت و نهێنى دكارن كار بۆ ئازادكرنا وان بكه‌ن،ژلايه‌كى ديڤه ئه‌ڤ چه‌نده ژى ل سه‌ر مللێن هه‌موو ئێزديان ژى مايه كو ئه‌و ب خۆ ده‌نگێ خۆ بگه‌هيننه ڤێ ميديايێ و دووپاتێ لێ بكه‌ن كو ل سه‌ر ڤى بابه‌تى نه‌سه‌كنت و به‌رده‌وام راپۆرتان به‌لاڤ كه‌ت هه‌تا گرتيێن مه دئێنه رزگاركرن.
ئيرۆ دناڤ ئێزديان دا چه‌ندين نڤيسه‌ر و رۆژنامه‌ڤان و چالاكڤان و كه‌سانێن خودان شيان و ب هێز هه‌ينه ،كو بكارن كاره‌ساتێ بۆزمانێن بيانى وه‌رگێرن و ب تايبه‌ت بگه‌هيننه ميديايا جيهانێ دا جيهان دهاوارا قيژى و ئازارێن گرتييان بێت و رزگاربكه‌ن،ب بۆچۆنا من ئه‌گه‌ر كاره‌سات ژلايێ ڤان چينان ڤه گه‌هشتبته سازيێن راگه‌هاندنێ،لێ هێش يا كێمه و پێدڤه ده‌زگه‌هێن ئێزديان يێن رۆژنامه‌ڤانى و راگه‌هاندنێ ئازارێن ئێزديان بگه‌هينن و ئه‌ڤه ئه‌ركه ل سه‌ر وان.
