ل سه‌رانسه‌رى جيهانێ ب سه‌دان سازيێن به‌ره‌ڤانيكرنێ ژ مافێ مرۆڤى هه‌ينه،ب تايبه‌ت ژى ل شه‌ران ده‌مێ كو كرياره‌ك ل دژى مرۆڤايه‌تيێ دئێته ئه‌نجامدان ئه‌و ب كار رادبن و مافێ مرۆڤى دپارێزن،ده‌مێ تيرۆرستێن داعشێ سه‌ر ب ده‌ڤه‌رێن ئێزديان داگرتى و ب تايبه‌ت ل قه‌زا شنگالێ دره‌نده‌ترين تاوانێن ل دژى مرۆڤايه‌تيێ ل پێش چاڤێ جڤاكێ نێڤ ده‌وله‌تى د ده‌رهه‌قێ ئێزديان دا ئه‌نجام دان.
ئێزدى بووينه قوربانيێن چه‌رخێ بيست و ئێكێ ده‌مێ تيرۆرستێن داعشێ ب هه‌زاران كچ وژن و زارۆكێن ئێزديان ره‌ڤانديين و هێش پترى سێ هه‌زار ره‌ڤاندييان د ده‌ستێ داعشێ دانه و رۆژانه تووشى نه‌خۆشيان دبن و دره‌نده‌ترين تاوان ل دژى وان دئێنه ئه‌نجامدان و ل بازاران يێ دئێنه كرين و فرۆتن ل پێش چاڤێن جڤاكێ نێڤ ده‌وله‌تى و هه‌موو حكوومه‌تێن جيهانێ،ئه‌ڤه پترى ساله‌ك و چه‌ند هه‌يڤايه نكارينه ب هه‌ر ئاوايه‌كى بتن ڤان ره‌ڤانديێن ئێزدى رزگار بكه‌ن و نه‌دياره ژى دێ كه‌نگى ئێنه ئازادكرن چنكو چوو ئۆپه‌راسيۆنێن تايبه‌ت ل سه‌ر ئاستێ نێڤ ده‌وله‌تى نه‌هاتينه كرن و هێش يێ ژنه‌خۆشيان و زوولم و زۆرداريێ دنالن و قيرا وانه كو كه‌سه‌ك ب هانه‌يا وان بچت و ژڤێ ده‌رده‌سه‌ريێ قورتالبن،ده‌مێ گوندێ كۆچۆ هاتيه دۆرپێچكرن بۆ ماوه‌يێ پازده رۆژان ڤيابا ئه‌و جهێن خۆ ب مافێ مرۆڤى ددانه زانين هنگى ئۆپه‌راسيۆنه‌ك كربان دا ئه‌ڤ ژماره‌يا كچ و ژن و زارۆكان نه‌كه‌ڤبانه د ده‌ستێ دره‌نده‌يان دا،هه‌رديسان بۆ ماوه‌يێ هه‌شت رۆژان ب هه‌زاران وه‌لاتيێن ئێزدى ئاواره‌يى چيايێ شنگالێ بوون و بۆ ماوه‌يێ هه‌شت رۆژان هاتنه دوورپێچكرن هاريكاريێن مرۆڤى زوو نه‌گه‌هشتنێ و ئه‌گه‌ر هێزێن پێشمه‌رگه‌ى نه‌گه‌هشتبانێ دا كاره‌ساته‌كا دى چێبتن،هه‌لويستێ حكوومه‌تا هه‌رێما كوردستانێ جهێ شانازى و رێزگرتنێ يه كو سه‌ره‌راى كاودانێن تێرا ده‌رباز دبت،ب سه‌دان ره‌ڤانديێن ئێزدى رزگاركرينه.
ل سه‌ر ئاستێ حكوومه‌تێن جيهانێ ده‌مێ وه‌لاتيه‌كى وان كو ئێكى ب تنێ دئێته ره‌ڤاندن ژ لايێ گرۆپێن تيرۆرستى ڤه ئێكسه‌ر جيهان هه‌موو ل سه‌ر دئێته ده‌نگ و كار ژبۆ رزگاركرنا وى دكه‌ن،به‌لێ هه‌زاران كه‌سێن ئێزدى ئێخسيرن د ده‌ستێ تيرۆرستان دا و چ پێنگاڤ بۆ رزگاركرنا وان ب جدى نائێنه كرن،ل ڤێده‌رێ دپرسم بۆچى جڤاكێ نێڤ ده‌وله‌تى و هه‌موو جيهان و حكوومه‌تا عێراقێ ڤێ جێوازيێ دگه‌ل ئێزديان دا دكه‌نه،ئه‌رێ ب چ شێواز به‌رێ خۆ د ده‌نه ئێزديان.
