ئه‌ندامه‌كى جڤاتا كارگێريا رێكخراوا ئێزديان يا دكيۆمێنتێ ئاشكه‌راكر،چه‌ند رێيێن دى هه‌ينه ب كاربينين بۆ ب ده‌ست ڤه ئينانا رازه‌مه‌نديێ ل سه‌ر ڤه‌كرنا دۆسه‌يا جينۆسايدا ئێزديان ل دادگه‌ها نێڤ ده‌وله‌تى ژبال داواكارێ گشتى،هه‌ڤده‌م ژى جڤاتا وه‌زيرێن عێراقێ ژى بريار دا كو ئه‌وا ب سه‌رێ ئێزديان هاتى تاوانا كۆمكوژيا ب كۆمه،به‌لێ ئه‌ڤه برياره و چ پێنگاڤ نه‌هاتينه كرن بۆ ب جهئينانا وێ.
(خالد ئه‌لخالدى)ئه‌ندامێ جڤاتا كارگێريا رێكخراوا ئێزديان يا دكيۆمێنتێ بۆ مالپه‌رێ ئێزديخان نيوز گۆت:برياردان ل سه‌ر تاوانێن نێڤ ده‌وله‌تى ل پێ سيسته‌مێ رۆما يێ سه‌ره‌كى بۆ دادگه‌ها تاوانێن نێڤ ده‌وله‌تى ب هه‌ر چار جۆرێن وێ نه‌كاره‌كى گرنگه پێدڤى ب كۆمه‌كا كارايه گرنگترين كار په‌سه‌ندكرنا وه‌لاتى ل سه‌ر ڤێ دادگه‌هێ دا ببته ئه‌ندام تێدا،عێراقێ ژى په‌سه‌ند ل سه‌ر سيسته‌مێ رۆما يێ سه‌ره‌كى نه‌كريه يانكو نه‌ئه‌ندامه د داگه‌ها نێڤ ده‌وله‌تى دا كو ئه‌وه دێ بريارێ ده‌ت كو ئه‌وا ئێزدى تووش بووينێ تاوانه‌كا كۆمكوژيا ب كۆمه،ياسايه‌ك هه‌يه دانپێدانێ ب جينۆسايدێ ناكه‌ت،هه‌تا عێراق نه‌بته ئه‌ندام د داگه‌هێ دا ب په‌سه‌ندكرنێ .
ئاماژه داوێ چه‌ندێ ژى دكارين رێيه‌كا دى ب كاربينين بۆ ب ده‌ست ڤه ئينانا رازه‌مه‌نديێ ل سه‌ر ڤه‌كرنا دۆسه‌يێ ل دادگه‌ها نێڤ ده‌وله‌تى ژبال داواكارێ گشتى ئه‌و ژى ب رێيا هندێ كو حكوومه‌تا عێراقێ داخواز بكه‌ت و ئه‌گه‌ر ئه‌ڤ داخوازى بجه نه‌هات گۆمان دێ كه‌فته دادوه‌ريا عێراقێ دا و كارينا وێ بۆ كۆنترۆلكرنا بابه‌تى،هه‌روه‌سا رێيه‌كا دى ژى هه‌يه كو داخوازيه‌كێ پێشكێشى جڤاتا ئاسايا نێڤ ده‌وله‌تى بكه‌ت بۆ دووڤچۆنێ ل سه‌ر كۆمكوژيا ئێزديان وى ده‌مێ عێراق بێته ل گه‌ل دادگه‌هێ يان داخوازيا حكوومه‌تێ.
ئه‌لخالدى گۆتژى بۆ ڤان داخوازيان مه‌رج دڤێن و دڤێته بێنه دابينكرن،ئێك ژى پێشتر چاڤدێرى و به‌لگه‌كرن ل سه‌ر تاوانه‌كا ده‌ست نيشانكرى يه دياره و گۆمانێ وه‌رناگرت يه پالپشتى كريه ب گرۆڤه‌يێن تاوانێ،يا دوويێ رايا گشتى ب دۆسه‌يێ ڤه وه‌ك سياسى و راگه‌هاندن و پێكۆلێن گه‌لى بۆ دانه‌نياسينێ ب كۆمكوژيێ،يا سيێ فشارا نێڤ ده‌وله‌تى نۆكه يا باشه،به‌لێ نه ل دووڤ ئاستێ پێدڤى يه،ئێكه‌تيا ئه‌وروپى بريار ل سه‌ر دا و ئه‌ڤه ه‌ست كه‌فت بوو،ديسان جڤاتا وه‌زيرێن عێراقێ ژى بريار دا كو ئه‌وا ب سه‌رێ ئێزديان هاتى تاوانا كۆمكوژيا ب كۆمه،به‌لێ ئه‌ڤه برياره و چ پێنگاڤ نه‌هاتينه كرن بۆ ب جهئينانا وێ،وه‌كى دانانا دادگه‌هه‌كا تايبه‌ت ل دووڤ شێوازێ دادگه‌هكرنا سه‌رۆكێ رژێما گۆر بگۆر.
ئه‌و چه‌نده ژى ئاشكه‌راكر،جينۆسايد پێدڤى ب پێكۆلێن هه‌موويان و كارگێريه‌كا ب هێزهه‌يه بۆ قۆناغێن داخوازكرنێ ل سه‌ر برياردانێ.
رێكخراوا ئێزديان يا دكيۆمێنتێ يا سه‌ربه‌خۆيه و باره‌گايێ وێ ل هه‌ولێرێ يه،كار ژبۆ دكيۆمێنتكرنا پێشلكاريێن ل دژى ئێزديان هاتينه ئه‌نجامدان دكه‌ت و بلند دكه‌ت بۆ جڤاكێ نێڤ ده‌وله‌تى و كاركرن ژبۆ برياردانێ.
