التخطي إلى المحتوى الرئيسي
بحث هذه المدونة الإلكترونية
رێ و ره‌سمێن جه‌ژنا خدر و لياس ده‌ستپێكرن
ئێزديخان نيوز:
رێ و ره‌سمێن جه‌ژنا خدر لياس،ئيرۆ 15شووباتێ 2016 ده‌ستپێكرن و رۆژێن( دووشه‌مبوو،سێ شه‌مبوو،چارشه‌مبوو)رۆژينه و پێنج شه‌مبوويێ جه‌ژنه،ڤێ جه‌ژنێ ژى گرێدانه‌ك ب وه‌رزێ چاندنێ و سروشتى ڤه هه‌يه.
ئه‌ڤ جه‌ژنه دكه‌فته دپێنج شه‌مبووا ئێكێ دا ژ هه‌يڤا سباتا رۆژهه‌لاتى،سێ رۆژا به‌رى هنگى ئانكو رۆژێن(دووشه‌مبوو،سێ شه‌مبوو،چارشه‌مبوو)رۆژينه ،ئه‌ڤ جه‌ژنه ب ئێك ژ جه‌ژنێن هه‌ره كه‌ڤن دئێته هژمارتن،پتريا ملله‌تێن كه‌ڤن،ل ده‌ڤه‌را رۆژهه‌لاتا ناڤين،رێ وره‌سمێ ڤێ جه‌ژنێ دگێران،جڤاكێ ئێزديا ئێك ژ وان جڤاكايه،رێ وره‌سم و بير و باوه‌رێن ڤێ جه‌ژنێ پاراستينه و هه‌تا نۆكه گرنگيه‌كا زۆر پێ دده‌ن،خدر و لياس ژى دناڤ ئێزديان دا،دوو چاكێن خودێ نه،پووته‌دان ب ڤێ جه‌ژنێ و هه‌ردوو چاكا(خدر و لياس)دناڤ ئێزديان دا ب ڤى ره‌نگێ ل خوارێ خويا دبت.
_پووته‌كا مه‌زن ب ناڤێن(خدر و لياس)دده‌ن.
_چه‌ندين نيشانگه‌هێن(خدر،لياس)ل گوند و ده‌ڤه‌رێن ئێزديان و ل په‌رستگه‌ها پيرۆزا لالش هه‌ينه.
رێ وره‌سمێن ڤێ جه‌ژنێ:
1.ل رۆژا دووشه‌مبوويێ،هه‌ر ماله‌ك هنده‌ك ده‌خل و دانى دقه‌لينت،دبێژنێ قه‌لاتك.
2. ل رۆژا چارشه‌مبوويێ،قه‌لاتكا دهێرن و دكه‌نه(پێخوون).
3. هه‌ر ديسان ل رۆژا چارشه‌مبوويێ،ئانكو ل هێڤارا جه‌ژنێ،كابانيێن مالا هنده‌ك پێخوونێ دسێنيكه‌كێ دكه‌ن و ل سه‌رێ خانيێ مالێ دادنێن،ب وێ هيڤيێ كو خدر لياس نيشانه‌كێ لێكه‌ت،وببته هێمايا خێر و به‌ره‌كه‌تێ دمالێ ده.
4.ل سبه‌يكا جه‌ژنێ ساڤارێن هێرايى و قه‌لاندى دكه‌نه زادێ جه‌ژنێ و دبێژنێ(چه‌رخووس).
5.جۆتيار هنده‌ك پێخوونێ ل زه‌ڤيێن خۆ ده‌رشينن بۆ خێر و به‌ره‌كه‌تێ.
هنده‌ك بير و باوه‌رێن ڤێ جه‌ژنێ:
1.ل رۆژێن رۆژيا و جه‌ژنێ،نێچير قه‌ده‌غه‌يه و سه‌ربر نائێنه سه‌رژێكرن. 2.هه‌روه‌سان دوان رۆژان دا،ئێزدى ب رێ و رێباريێن دوور ناچن.
3.باوه‌رى هه‌يه كو دشه‌ڤا جه‌ژنێ دا هه‌ر گه‌نجه‌كى دخه‌ونا خۆ دا ئاڤێ ل ماله‌كێ ڤه‌خۆت،دێ قيزا وێ مالێ بته نه‌سيبێ وى و هه‌مان باوه‌رى بۆ قيزێ ژى هه‌يه.
