قايممقامێ قه‌زا شنگالێ ئاشكه‌راكر،ئۆپه‌راسيۆنا رزگاركرنا كۆمه‌لگه‌هێن باشوورێ شنگالێ يێن دبن كۆنترۆلا داعشێ دا نێزيك بوويه،پلان ژى هه‌يه و ده‌مژمێرا سفر نه‌هاتيه ده‌ستنيشانكرن.
راگه‌هاندنا قايممقاميا قه‌زا شنگالێ،ئيرۆ 30كانوونا دوويێ 2016راگه‌هاند،دكۆنگره‌يه‌كى رۆژنامه‌ڤانى دا كو ل دهۆكێ هاتبوو سازدان(مه‌حما خه‌ليل)قايممقامێ شنگالێ ل سه‌ر راستييا باژێرێ شنگالێ يێ نۆكه و يێ پاشه‌رۆژێ ئاخڤى و ئاماژه دا رۆلێ قاره‌مانانه يێ هێزێن پێشمه‌رگه‌ى ب سه‌ركردايه‌تيا(سه‌رۆك بارزانى)ل ئۆپه‌راسيۆنا رزگاركرنا شنگالێ دا،ب قوربانيدانا خه‌لكێ شنگالێ و پێشمه‌رگه‌يى پێشكێشكرى،شنگال نۆكه يا رزگاربوويه.
ده‌رباره‌ى ئازادكرنا كۆمه‌لگه‌هێن باشوورێ شنگالێ گۆت:پلانه‌ك هه‌يه بۆ رزگاركرنا وان ده‌ڤه‌ران و ئۆپه‌راسيۆنا رزگاركرنا وان ده‌ڤه‌ران يا نێزيكه،به‌لێ ده‌مژمێرا سفر نه‌هاتيه ده‌ستنيشانكرن.
سه‌باره‌ت گۆرێن بكۆم ژى ئاشكه‌راكر:ل گه‌ل پارێزگه‌ها دهۆكێ و وه‌زاره‌تا شه‌هيد و ئه‌نفالكريان نۆكه هه‌ماهه‌نگى يا دئێته كرن بۆ پاراستنا گۆران.
ل دۆر به‌ربژێكرنا(ناديا موراد) گۆت:ئه‌م پشته‌ڤانيا وێ دكه‌ين و دڤێت چه‌ند خه‌لاتێن دى ژى ب ده‌ست ڤه بينت،نه‌كو ئێك خه‌لاتى.
ژلايه‌كى ديڤه ژى ل سه‌ر خزمه‌تكاريێن سه‌ره‌كى ئاخڤى يێن كو دڤێت كار ل سه‌ر بێته كرن بۆ گه‌هاندنا وان بۆ ده‌ڤه‌رێن رزگاركرى.
