التخطي إلى المحتوى الرئيسي
بحث هذه المدونة الإلكترونية
بنگه‌هێ لالش جه‌ژنا رۆژيێن ئێزى ل ئێزديان پيرۆز دكه‌ت
ئێزديخان نيوز:
ب هه‌لكه‌فتا جه‌ژنا رۆژيێن ئێزى كو دبته ساله‌ك لسه‌ر ده‌ربازبوونا ئازادكرنا ده‌ڤه‌را سنوونێ كو هنگى ب هه‌زاران خێزان دچيا دا دۆر پێچ ببوون،وه ديسان دبته هه‌يڤه‌ك ل سه‌ر ئازادكرنا شنگالێ ژ ئاليێ پێشمه‌رگه‌يێن كوردستانێ و ب سه‌رپه‌رشتيا راسته‌وخۆيا جه‌نابێ سه‌رۆك بارزانى،ئه‌م دووپات دكه‌ين كو جه‌ژنا مه‌زن دێ ئه‌و بت ده‌ما هه‌موو ئاخا كوردستانێ ب گشتى و يا ده‌ڤه‌رێن ئێزديان ب تايبه‌تى ژ تيرۆرستان دئێته پاقژكرن،و ديسان ژى ئازادكرنا هه‌موو كچ و دايكێن تا نها دبن ده‌ستێ تيرۆرستان دا هنگى وێ ببته جه‌ژنا مه هه‌مووان،دياره ئازادكرنا شنگالێ جهێ دلخۆشيا هه‌موويان بوويه له‌وا ژى داخوازا ئازادكرنا ده‌ڤه‌رێن دى ژى دكه‌ين،ژبه‌ركو ئازادكرنا ڤێ ده‌ڤه‌رێ دربه‌كا مه‌زن ل داعش دا،ئه‌م دووپات دكه‌ين ژ به‌ر وێ گرنگيپێدانا سه‌ركردايه‌تيا سياسى يا كوردستانێ ب تايبه‌ت جه‌نابێ سه‌رۆك بارزانى ب مه دده‌ت پێشه‌رۆژه‌كا گه‌ش ل به‌راهيا مه هه‌يه چ ل سه‌ر ئاستێ كوردستانێ ژى بۆ مه ئێزديان ب تايبه‌تى.
هه‌ر ديسان ئه‌و ماندووبوون و قوربانيدانا هێزێن پێشمه‌رگه‌ى ل شه‌رێ دژى تيرۆرێ جهێ رێز و قه‌درگرتنێ يه،هێزا پێشمه‌رگه‌ى ب سه‌رپه‌رشتيا سه‌رۆك بارزانى نيشانا پاراستنا خاكا كوردستانێ يه،له‌وا ژى ئه‌م دوێ باوه‌ريێ دانه وێ ئارامى ل ته‌ڤايا ده‌ڤه‌رێن په‌يداببت ل ده‌مه‌كى نێزيك.
لێ دياردا كۆچكرنا گه‌نجێن مه بۆده‌ڤه‌ى وه‌لاتى ئه‌م ب خه‌م كرينه،راسته هه‌ر كه‌سى ئازاده بۆ هه‌لبژارتنا ژيانا خۆ چونكى برياره‌كا ب ويڤه گرێدايه،لێ ئه‌م دبێژين ب ڤێ دياردێ وێ ناسناما خۆ به‌رزه كه‌ت،چونكى ئه‌وي ته‌ڤلى شارستانيه‌تا رۆژئاڤا بت و ناسناما خۆ يا ره‌سه‌ن ژ بير بكه‌ت،له‌وا داخواز دكه‌ين هه‌ر كه‌سێ ڤيا كۆچ بكه‌تن زوو ب زووى بريارێ نه‌ده‌ت و باش هزر بكه‌ت،چونكى ئه‌ڤه دبته هێمايه‌ك بۆ بێده‌نگيا وى هه‌مبه‌ر 74فه‌رمانێن ب سه‌رێ ئێزديان هاتين چونكى ل فه‌رمانێن به‌رێ نه هاريكاريێن نێڤ ده‌وله‌تى هه‌بوون نه‌ژى يێن نافخۆيى،لێ نها ئه‌م جهێ گرنگيپێدانا نێڤ ده‌وله‌تى و هه‌رێمى نه،ژبه‌ر هندێ دڤێت ئه‌م ب ئازايانه‌و ب به‌رخودانێ ئه‌م ناسناما خۆ يا ره‌سه‌ن و كلتۆر و ديرۆكا خۆ ل ناڤ ئاخا باب و كالێن خۆ بپارێزن،چونكى دڤێ قۆناغێ ده ره‌نگه نيشانێن ده‌وله‌تبوونا كوردى هه‌نه و هنگى ئه‌م به‌شه‌كى ره‌سه‌نن ژڤى وه‌لاتى،له‌وا نابت ئه‌م ڤان خه‌ونا ب جه بهێلن و وه‌لاتێ خۆ چۆل بكه‌ين پشتى وێ قوربانى و مالوێرانكرنا خه‌لكێ كوردستانێ ب گشتى و ئێزديان ب تايبه‌تى ديتى.
ژ ئاليه‌كى ديڤه ئه‌م دبێژين جه‌ژنا مه ئازادكرنا هه‌موو ده‌ڤه‌ر و گرتيێن مه‌نه،و ئه‌و كه‌سين هاريكاريا تيرۆرستان كرين ل شنگالێ و هه‌موو ده‌ڤه‌رێن دى و بووينه ئه‌گه‌رێ ره‌ڤاندنا كچ و ژن و زارۆكين مه راده‌ستى ياسايێ بكه‌ن،داكو بگه‌هنه سزايێ خۆ يێ عاديلانه نه‌كو ئه‌م به‌ره‌لايه‌كى تۆلا خۆ ڤه‌كه‌ين،وب ڤێ هه‌لكه‌فتێ ئه‌م سوپاسيێن خۆ ئاراسته‌ى گه‌لێ كوردستانێ دكه‌ين ئه‌وێن كو به‌رئه‌ركێ خۆ يێ نه‌توه‌ى رابووين هه‌مبه‌ر خه‌لكێ مه يێ كۆچبه‌ر بوويى كو ئه‌ڤه نێزيكى ساله‌ك و چار مه‌هايه،و دووپات كرن كو سه‌ره‌رايى جودابوونا ئاينى ل كوردستانێ ئه‌م ئێك رێز و ئێك ده‌ستين.
شێخ شامۆ
سه‌رۆكێ ده‌سته‌يا بلندا بنگه‌هێ لالش /دهۆك
17/12/2015
