دكۆنگرێ نێڤ ده‌وله‌تى يێ ل دۆر (به‌رفره‌هيا دينى و ئۆلى و ره‌وشه‌نبيرى و پێكڤه‌ژيانێ ل رۆژهه‌لاتا ناڤين) دا يێ ل پايته‌ختێ وه‌لاتێ يۆنانێ هاتيه ل دارخستن،نونه‌رێ ميرێ ئێزديان ل عيراقێ و جيهانێ په‌يڤه‌ك پێشكێشكر و تێدا داخوازكر ده‌رگه‌هێ مافێ په‌نابه‌ره‌تيێ بۆ ئێزديان ل ئه‌وروپا بێته ڤه‌كرن و ئێزديێن ل كه‌مپێن توركيا دا بۆ وه‌لاتێن ئه‌وروپى بێنه ڤه‌گۆهاستن و پشته‌ڤانيا ئێزديان بێته كرن ژبۆ سپاندنا ئه‌وا ب سه‌رێ ئێزديان هاتى ل دادگه‌ها نێڤ ده‌وله‌تى ب جينۆسايد بێته ناساندن.
راگه‌هاندنا په‌رستگه‌ها لالش ئيرۆ ل رێككه‌فتى 22/10/2015راگه‌هاند،(برين ته‌حسين بگ) نونه‌رێ ميرێ ئێزديان ل عيراقێ و جيهانێ و (پێشيمام فارۆق) به‌شدارى دكۆنگرێ (به‌رفره‌هيا دينى و ئۆلى و ره‌وشه‌نبيرى و پێكڤه‌ژيانێ ل رۆژهه‌لاتا ناڤين) دا يێ ل پايته‌ختێ وه‌لاتێ يۆنانێ ل ماوێ 18هه‌تا 20ڤێ هه‌يڤێ هاتبوو ل دارخستن كر و تێدا په‌يڤه‌ك پێشكێشكر و به‌حسێ ئه‌وا ل 3/8/2014ب سه‌رێ ئێزديان هاتى كر و داخواز ژ هه‌موويان كر پشته‌ڤانيا ئێزديان بكه‌ن و ده‌رگه‌هێ مافێ په‌نابه‌ره‌تيێ بۆ ئێزديان ل ئه‌وروپا بێته ڤه‌كرن و ئێزديێن ل كه‌مپێن توركيا دا بۆ وه‌لاتێن ئه‌وروپى بێنه ڤه‌گۆهاستن و پشته‌ڤانيا ئێزديان بێته كرن ژبۆ سپاندنا ئه‌وا ب سه‌رێ ئێزديان هاتى ل دادگه‌ها نێڤ ده‌وله‌تى ب جينۆسايد بێته ناساندن و ده‌ڤه‌ره‌كا ئارام و پاراستنا نێڤ ده‌وله‌تى بێته دابينكرن بۆ ئێزديان ل عيراقێ يێن دڤێت لێ بمينن.
راگه‌هاندنا په‌رستگه‌ها لالش ئاشكه‌راكريه ژى كو ل ڤى كۆنگره‌ى شاندێ ئێزديان ديدار ل گه‌ل سه‌رۆك وه‌زيرێن يۆنانێ و نونه‌رێ ئه‌ميندارێ گشتيێ نه‌ته‌وه‌يێن ئێكگرتى و چه‌ند كه‌سايه‌تيێن دى كرينه.
