قوتابيێن ئێزدى ئێدى چاڤه‌رێ مووسلێ نابن و ل كوردستانێ بوونه هه‌ميشه‌يى
ئێزديخان نيوز:
ل سه‌ر راسپارده‌يا(سه‌رۆك بارزانى)سه‌رۆكێ حكومه‌تا هه‌رێما كوردستانێ رازه‌مه‌ندى دا كو ئه‌و قوتابيێن كوردێن ئێزدى يێن ل زانكۆيا مووسلێ دخوند،ب شێوێ هه‌ميشه‌يى ل زانكۆ و په‌يمانگه‌هێن هه‌رێمێ درێژيێ ب خوندنا خۆ بده‌ن و ببنه قوتابيێن كوردستانێ و ئێدى چاڤه‌رێى مووسلێ نه‌كه‌ن.
شێخ شامۆ،نونه‌رێ كوردێن ئێزدى ل په‌رله‌مانێ كوردستانێ ب مالپه‌رێ فه‌رميێ پارتى ديموكراتى كوردستان راگه‌هاند،مه وه‌كو بنگه‌هێ لالش گه‌له‌ك هه‌ول دا كێشه‌يا خوندنا قوتابيێن ئێزدى يێن سه‌ر ب زانكۆيا مووسلێ ڤه چاره‌سه‌ربكه‌ين،كو ب شێوێ كاتى ل زانكۆ و په‌يمانگه‌هان دخوند،له‌وا مه داخوازكر ب شێوه‌يه‌كى هه‌ميشه‌يى بخونن و ببنه قوتابيێن هه‌رێما كوردستانێ، ل سه‌ر راسپارده‌يا(سه‌رۆك بارزانى)سه‌رۆكێ حكومه‌تا هه‌رێما كوردستانێ رازه‌مه‌ندى دايه كو قوتابيێن كوردێن ئێزدى يێن سه‌ر ب زانكۆيا ناڤبرى ڤه ب شێوێ هه‌ميشه‌يى ل زانكۆ و په‌يمانگه‌هێن هه‌رێمێ درێژيێ ب خوندنا خۆ بده‌ن.
شێخ شامۆ،سه‌رۆكێ بنگه‌هێ لالشه ل دهۆكێ،گۆتژى وه‌زاره‌تا خوندنا بلند ئه‌ڤ برياره ده‌رێخستيه و بۆ هه‌موو دام و ده‌زگه‌هێن په‌يوه‌نديار شانديه،ئه‌ڤه‌ش ده‌ستكه‌فته‌كى مه‌زنه بۆ قوتابيێن مه،چنكو ئه‌ڤه كێشه‌يه‌كا مه‌زن بوو.
نونه‌رێ كوردێن ئێزدى ل په‌رله‌مانێ كوردستانێ رۆنكر ژى،ئێك ژ وان خالێن دى يێن دبريارا سه‌رۆكێ حكومه‌تێ ئاماژه پێكرى ئه‌وه كو هه‌ر قوتابيه‌كى قۆناغا ئاماده‌يى ته‌مام بكه‌ت دێ راسته‌وخۆ ل زانكۆ و په‌يمانگه‌هێن هه‌رێمێ ئێته وه‌رگرتن.
شێخ شامۆ راگه‌هاندژى لژنه‌يا مه ل بنگه‌هێ لالش دێ كاروبارێن قوتابيان ب رێڤه‌به‌ن و پێشوازيێ لێ كه‌ن و ئێدى قوتابيێن مه چاڤ ل مووسلێ نابت و دێ بنه قوتابيێن هه‌ميشه‌يى يێن هه‌رێما كوردستانێ.
ل دووڤ بريارا سه‌رۆكێ حكومه‌تێ ئه‌و قوتابيێن ب شێوێ هه‌ميشه‌يى ل زانكۆ و په‌يمانگه‌هێن هه‌رێمێ دێ خونن،ژماره‌يا وان نێزيكى 2هه‌زار قوتابيايه.
