شێخ شامۆ ژ ئه‌مريكا دخوازت يا پشته‌ڤان بت بۆ رزگاركرنا ره‌ڤاندييان
ئێزديخان نيوز:
شێخ شامۆ ئه‌ندامێ په‌رله‌مانێ كوردستانێ دگه‌ل كونسلێ ئه‌مريكى يێ گشتى ل هه‌ولێرێ كۆمبوو،دديداره‌كێ دا هه‌ردوولايان چه‌ند كێشه و مه‌سه‌له گه‌نگه‌شه‌كرن.
دڤێ ديدارێ دا يا بۆ ماوێ ده‌مژمێره‌كێ ڤه‌كێشايى،شێخ شامۆ ئه‌ندامێ په‌رله‌مانێ كوردستانێ وماتياس متيمان كونسلێ ئه‌مريكى يێ گشتى ل هه‌ولێرێ چه‌ند كێشه و مه‌سه‌له گه‌نگه‌شه‌كرن،هه‌روه‌سا شێخ شامۆ به‌حسا ره‌وشا كوردستانێ كر يا نهۆ تێرا ده‌رباز دبتن و ب تايبه‌ت پرسا سه‌رۆكاتييا هه‌رێمێ، خواست ژى هه‌موو ئالى بگه‌هنه رێككه‌فتنه‌كێ لسه‌ر مانا سه‌رۆك بارزانى بتن،ژبه‌ركو ئه‌و يێ هه‌رێمێ دكاودانێن ب زه‌حمه‌ت دا يێ برێڤه دبه‌ت و هه‌ر سه‌رۆك بارزانى تيرۆرستێن داعش ژوان ده‌ڤه‌ران ده‌رێخستينه يێن به‌رى ساله‌كێ داگيركرين و ژوانا ده‌ڤه‌رێن كوردێن ئێزدى.
شێخ شامۆ ئاماژه دا وێ چه‌ندێ ژى كو دڤێت به‌رده‌وام پشته‌ڤانيا ئاواره‌يان ل هه‌رێمێ بێته كرن و ب تايبه‌ت ئاواره‌يێن ئێزدى،چنكو ئه‌و يێ دكاودانێن ب زه‌حمه‌ت دان و داخوازكر كو پێدڤيه پشته‌ڤانيا رزگاربوويێن ئێزدى يێن ژ ده‌ستێن تيرۆرستێن داعش قوورتالبووين بێته كرن كو بێنه پێگه‌هاندن ژلايێ ده‌روونى ڤه كو بگونجن دجڤاكى دا،هه‌روه‌سا ژ وانشنتن خواستن يا پشته‌ڤان بت بۆ رزگاركرنا ره‌ڤاندييان.
دته‌وه‌ره‌كى دى دا شێخ شامۆ پشته‌ڤانيا ئه‌مريكى ب گرنگ ل قه‌له‌م دان،ژبه‌ركو ئه‌وا ب سه‌رێ كوردێن ئێزدى لشنگالێ هاتى ئه‌و تاوانا كۆمكوژييا بكۆمه و جينۆسايده.
شێخ شامۆ ده‌رباره‌ى مه‌سه‌لا كۆچكرنا گه‌نجێن ئێزديان گۆت:ژمارا ئێزديان يا كێمه و كۆچكرنێ دێ كارتێكرنا خۆ لسه‌ر ئێزديان هه‌بتن.
ژلايێ خۆڤه كونسلێ ئه‌مريكى داخواز ژ ئێزديان كر ته‌حه‌مولێ بكێشن هه‌تا رێكخراوا داعش يا تيرۆرستى ژناڤ دچت.
ل دووماهيا ڤێ ديدارێ،شێخ شامۆ دروشمێ بنگه‌هێ لالش وه‌ك خه‌لاته‌كى رێزلێنانێ پێشكێشى كونسلێ ئه‌مريكى ل هه‌ولێرێ كر ژبه‌ر هه‌لويستێ وى يێ ئيجابى ل هه‌مبه‌ر كوردێن ئێزدى.
