رێكخراوا داك دێ پشته‌ڤانيا ژنا ئێزدى كه‌تن

ئێزديخان نيوز:

به‌رپرسا رێكخراوا داك ژبۆ گه‌شه‌پێدانا ژنا ئێزدى بۆ ئێزديخان نيوز دياركر،ژبۆ پشته‌ڤانيكرنا ژنا ئێزدى مه‌ چه‌ند ئارمانج داناينه‌ و دبياڤێن جودا جودا دێ هاريكاريا وێ كه‌ين. 

سوزان سه‌فه‌ر،به‌رپرسا رێكخراوا داك ژبۆ گه‌شه‌پێدانا ژنا ئێزدى گۆت:ئارمانجێن رێكخراوێ يێن داهاتى ئه‌و ژى دێ ل سه‌ر چه‌ند خالان بن وه‌كو هاندان و پالپشتيا ژنا ئێزدى و زانينا وێ ده‌رباره‌ى ماف و ئه‌ركێن وێ ژبۆ به‌شداريكرن دئاڤاكرنا جڤاكى دا و پالپشتى وێ ب رێيا پرۆژێن بچووك ژبۆ هاريكاريكرنا وێ ژلايێ ئابوورى ڤه‌،هه‌روه‌سا پێشئێخستنا شيانێن وێ يێن كاركرنێ وه‌ك دروار و هه‌موو جۆرێن كارين ده‌ستى ب تايبه‌ت بۆ ژنێن كرێكار،ديسان  پالپشتيا ژنێن كرێكار و تايبه‌تمه‌ند ب گه‌شه‌كرنا شيانين وێ يێن كارى و زانستى و ره‌وشه‌نبيرى و هزرى ب به‌شداريكرنا وێ دخۆلێن جۆراو جۆردا و گهۆرينا شاره‌زايێ دكارى دا ل گه‌ل كۆمه‌لگه‌هێن به‌رى مه‌ به‌شدارى كرين ب رێيا رێكخراوێن نه‌حكومى.

سه‌فه‌ر ئه‌و چه‌نده‌ ژى دياركر، هه‌ر ژئارمانجێن رێكخراوا مه‌ گه‌شه‌كرنا ميديايا(نسوى)ب شێوه‌يه‌كى گونجاى دگه‌ل جڤاكێ ئێزدى ب رێيا ڤه‌كرنا خۆلێن راگه‌هاندنێ و به‌شداريكرنا ژنێ دڤان خۆلان دا ب شێوه‌يه‌كى به‌رده‌وام و پالپشتيا و هاندانا كچێن شيانێن كارى هه‌ين دبوارێ ته‌ندروستى دا و هشياركرنا خێزانێن وان ژبۆ گرنگيا ڤى بوارێ مرۆڤايه‌تى دژيانێ دا،هه‌روه‌سا كاركرن ژبۆ گه‌شه‌كرنا شيانێن وێ و به‌شداريكرنا وێ دبوارێ سياسى دا داكو ببته‌ سه‌ركرده‌ دكارێ خۆ دا.

به‌رپرسا رێكخراوا ناڤبرى دا رۆنكرن ژى كو ئه‌و دێ كارى ژبۆ هشياركرنا وێ ژبۆ گرنگيا كارێ خۆبه‌خشيێ بتايبه‌ت كو ژنا ئێزدى بوويه‌ قوربانيا ناكوكى و شه‌رى و پێدڤى ب پشته‌ڤانيا ئێك هه‌يه‌،زێده‌بارى هاندانا وێ ژبۆ خوندان و فێركرنێ و نه‌هێلانا نه‌خونده‌واريێ ل ناڤ ژنان،هه‌روه‌سا چاره‌سه‌ركرنا ژنێن توندوتيژى لێ هاتيه‌ كرن ب تايبه‌تى كچ و ژنێن ژ ده‌ستێ داعش رزگاربووين و هاريكارييا وان ب ڤه‌كرنا بنگه‌هێن پێگه‌هاندنێ ده‌روونى ژبۆ چاره‌سه‌ركرنێ.