نێچيرڤان بارزانى پشتگرييا دامه‌زراندنا جڤاتا ئێزديان دكه‌ت

ئێزديخان نيوز:

سه‌رۆك وه‌زيرێن حكومه‌تاهه‌رێما كوردستانێ(نێچيرڤان بارزانى) پشته‌ڤانيا خۆ بۆ دامه‌زراندنا جڤاتا ئێزديان دياركر و هه‌موو پشته‌ڤانى بۆ سازدانا كۆنگرێ دامه‌زراندنا جڤاتێ دووپاتكر،راگه‌هاند ژى دامه‌زراندنا جڤاتا ئێزديان پێنگاڤه‌كه‌ بۆ پاراستنا تايبه‌تمه‌ندييا ئاين و كولتۆرێ ئێزديانه‌.

 مالپه‌رێ فه‌رميێ پارتى ديموكراتى كوردستان به‌لاڤكريه‌ كو دوهى 5/6/ل دهۆكێ (نێچيرڤان بارزانى)سه‌رۆك وه‌زيرێن حكومه‌تا هه‌رێما كوردستانێ پێشوازى ل شانده‌كى جڤاتا رۆحانيا ئێزديان ب سه‌رۆكاتيا حازم مير ته‌حسين به‌گ،جێگرێ ميرێ ئێزديان كر.

دبه‌شه‌كى ديدارێ دا،شاندێ ئێزديان داخوازا پشته‌ڤانيێ ژ سه‌رۆك وه‌زيرێن هه‌رێمێ كر بۆ دامه‌زراندنا جڤاتا ئێزديان كو داخوازيا هه‌موو پێكهاتێن ئێزديه‌ ل ناڤخۆ و ژ ده‌رڤه‌ى وه‌لاتى،بۆ هندێ ل گه‌ل مير و جڤاتا رۆحانى و لايه‌نێن په‌يوه‌نديدارێن حكومه‌تا هه‌رێما كوردستانێ،كاروبارێن ئێزديان ل ناڤخۆ و ده‌رڤه‌ى وه‌لاتى ب رێڤه‌ ببه‌ن،بۆڤێ مه‌ره‌مێ كۆنگره‌يه‌ك دامه‌زراندن دێ گێرن كو تێدا نونه‌رێن ئێزديان ل ناڤخۆ و ژ ده‌رڤه‌ى وه‌لاتى به‌شداريێ تێدا دكه‌ن. 

ژلايێ خۆ ڤه‌ نێچيرڤان بارزانى پشته‌ڤانيا خۆ بۆ دامه‌زراندنا جڤاتا ئێزديان دياركر و هه‌موو پشته‌ڤانى بۆ سازدانا كۆنگرێ دامه‌زراندنا جڤاتێ دووپاتكر،ئه‌و چه‌نده‌ ژى رۆنكركو كه‌سه‌ك نكارت ناسنامه‌يا نه‌ته‌وه‌ييا ئێزديان كو كوردن،بێخته‌ بن پرسيارێ و ئاماژه‌ ب هندێ دا كو ئێزديان دمێژوويێ دا باجه‌كا مه‌زن دايه‌ بۆ پاراستنا زمان و ناسناما نه‌توه‌يى و تايبه‌تمه‌ندييا ئايينێ خۆ.