دبه‌رژه‌وه‌ندييا شنگالێ دايه‌،ڤيان ده‌خيل و به‌شار ئه‌لكيكى رێككه‌فتن

ئێزديخان نيوز:

په‌رله‌مانتار ڤيان ده‌خيل ژ هه‌ڤپه‌يمانيا كوردستانى  دگه‌ل به‌شار ئه‌لكيكى سه‌رۆكێ جڤاتا پارێزگه‌ها مووسلێ ل پارێزگه‌ها به‌غدايێ  كۆمبوو،كو ره‌وشا ئاواره‌يان و چاوانيا هاريكاريكرنا وان ته‌وه‌رێن سه‌ره‌كى يێن كۆمبوونێ بوون و به‌حسێ چه‌ند بابه‌تێن دى ژى كرن.

نڤيسينگه‌ها په‌رله‌مانتار ڤيان ده‌خيل راگه‌هاند، كو دديداره‌كێ دا هه‌ردوولايان به‌حسێ  ره‌وشا ئاواره‌يان و چاوانيا هاريكاريكرنا وان بۆ ده‌ربازكرنا كاودانێن مه‌عيشى و مرۆڤايه‌تى ئه‌و تێدا دبۆرن كرن،پاشى به‌حسێ وان ئه‌لياتێن كو ئێش و ئازارێن رزگاربوويان سڤك بكن و كار ژبۆ پێگه‌هاندن و وگونجاندانا وان دجڤاكى دا كرن. 

دته‌وه‌ره‌كى دى يێ ڤێ ديدارێ دا ڤيان ده‌خيل و به‌شار ئه‌لكيكى ل سه‌ر ئه‌نجامدانا چه‌ند ديدارێن دى ل پاشه‌رۆژێ رێككه‌فتن،ژبۆ دانانا ئستراجييه‌ته‌كێ پشتى رزگاركرنا شنگالێ و يا تايبه‌ت يا چاوانيا ئاڤاكرنا وان ئاڤاهييان و ژێرخانێ يێن تيرۆرستێن داعش خرابكرين  و كارتێكرنێن ده‌روونى يێن دده‌روونێ خه‌لكێ شنگالێ دا هيڵاين،ژبۆ هندێ ژيان بۆ سرۆشتێ خۆ بزڤرته‌ ڤه پشتى داعش شكستى.

 ل داوييا ڤێ ديدارێ ده‌خيل رۆلێ سه‌رۆك و ئه‌ندامێن جڤاتا پارێزگه‌ها مووسلێ بلند نرخاندن ل وێ دووڤچۆنا وان يا بۆ دۆسه‌يا مرۆڤايه‌تى و سه‌ره‌دانێن وان بۆ ده‌ڤه‌رێن رزگاربووى و كه‌مپێن ئاواره‌يان.