شێخ شامۆ:باشترين چاره‌ بۆ ئێكلايكرنا ده‌ڤه‌رێن مه‌ ريفراندۆمه‌

ئێزديخان نيوز: 

ل په‌رله‌مانێ كوردستانێ نونه‌رێن پێكهاته‌يێن ئێزديا و توركمانا و مه‌سيحيا ، دوهى 13/5 پێشوازى  ل ماباتلهار و نونو دايمو به‌رپرسا به‌شێ راميارى ل نونه‌راتيا نه‌ته‌وه‌يێن ئێكگرتى بۆ هاريكاريكرنا عيراقێ يونامى كرن.

 دديداره‌كێ دا(نونو)سێ بابه‌ت پێشكێشى نونه‌رێن پێكهاته‌يان كرن و دڤيا بۆچۆنا وان ل سه‌ر بابه‌تێن ئاشتيا نشتيمانى و مادا 140 ژ ده‌ستوورێ عيراقێ و پرۆژێ گرنتيكرنا مافێن پێكهاتان ل په‌رله‌مانێ كوردستانێ وه‌رگرت.

 درونشتنێ دا نونه‌رێ ئێزديان ل په‌رله‌مانێ كوردستانێ(شێخ شامۆ) بۆچۆنا خۆ ل سه‌ر وان بابه‌تێن ژلايێ ماباتلهار و نونو دايمو هاتينه‌ پێشكێشكرن دياركر،ئه‌وژى بۆ ئاشتيا نشتيمانى،ب ديتنا من ئه‌وه‌ ئه‌م پێكهاتێن ئاينى و نه‌ته‌وه‌ى مه‌ بتر ژ هه‌ر لايه‌نه‌كى پێدڤى ب ئاشتيا نشتيمانى هه‌يه‌،به‌لێ مخابن مه‌ باوه‌رى ب ئاشتيا نشتيمانى عيراقێ نه‌مايه‌،نمونه‌ ژى دستورێ عيراقێ ل سه‌ر بنه‌مايێ به‌رهه‌مێ ئاشتيا نشتيمانى بوو و ل ڤى دستورى ئاينێ ئێزديان ب فه‌رمى هاتبوو قه‌بوولكرن ب جهودا مه‌زنا سه‌رۆك بارزانى،لێ مخابن لژێر كراسێ داعش و ده‌وله‌تا ئيسلامى ئه‌م ب كافر قه‌بوولكرن و كاره‌سات و زۆردارييه‌كا مه‌زن ب سه‌رێ مه‌ ئانين و تايبه‌ت ده‌ڤه‌را شنگال هه‌ر عيراقى بوون و هنده‌ك ئه‌ره‌بێن سونه‌ يێن دوهى دوستێن نێزيكى مه‌ بوون.

سه‌باره‌ت مادا 140،شێخ شامۆ دياركر،ددرێژيا ديرۆكێ دا به‌رى دامه‌زراندنا ده‌وله‌تا عيراقێ و پشتى دامه‌زراندنێ به‌رده‌وام ئێزدى تووشى تاوان و جينۆسايدا بووينه‌ و جوگرافيه‌تا مه‌ به‌رده‌وام قه‌ده‌را مه‌بوويه‌،دووجاران ئه‌م هاتنه‌ په‌رچقاندن جاره‌كێ وه‌ك دين(ئێزدى) و جاره‌كێ وه‌ك نه‌ته‌وه‌(كورد).

شێخ شامۆ ئه‌و چه‌نده‌ ژى دياركر،كو ئاسته‌نگ كرنا ب جهئينانا ڤى ماده‌ى يێ ژلايێ حكومه‌تا به‌غدا ڤه‌ بوو ئه‌گه‌رێ سه‌ره‌كيێ ڤێ تاوانا داعش ب سه‌رێ خه‌لكێ مه‌ ئانى،له‌وا باشترين چاره‌ بۆ ئێكلايكرنا ده‌ڤه‌رێن مه‌ ريفراندۆمه‌ دا خه‌لكێ مه‌ بريارا خۆ بده نابت چ كه‌سانه‌ك بريارێ ل سه‌ر چاره‌نڤيسێ ئێزديان بده‌ن،چنكو خه‌لكێ مه‌ گه‌هشتيه‌ وێ باوه‌ريێ تايبه‌ت پشتى كاره‌ساتا3/8/2014ێ ده‌ست پێكرى وه‌لاته‌ك نينه‌ ژبلى كوردستانێ لمه‌ خودان ده‌ركه‌فتى و هاريكاريا مه‌ كرى و هێزه‌ك نينه‌ ژبلى پێشمه‌رگه‌يێ قاره‌مان به‌ره‌ڤانى ژ مه‌ كرى و ب خوونا خۆ ده‌ڤه‌رێن مه‌ به‌رده‌وام ئازاد دكه‌ ب سه‌روه‌رييا سه‌رۆك بارزانى و ده‌ڤه‌رێن مه‌ يێن ماى ژى ل  هيڤيا پێشمه‌رگه‌ى نه‌. 

ده‌رباره‌ى پرۆژێ گرنتيكرنا مافێن پێكهاتان ل په‌رله‌مانێ كوردستانێ،نونه‌رێ ئێزديان گۆت:باشترين گرنتيكرن و پشتراسكرن بۆ ئازاديا مافێن پێكهاتان ئه‌وه‌ ل دستورێ كوردستانێ يێ نێزيك دين و ده‌وله‌ت ژ هه‌ڤ بێنه‌ جوداكرن ئانكو(دين بۆ خودێ و  وه‌لات بۆ هه‌موويان)و يه‌كسانيا جڤاكى و ئاينى و مافێن جودا  جودا دوى دستورى دا بۆ هه‌مووپێكهاتێن كوردستانێ تێدا بچه‌.