مالا ئێزديا چ ژ سه‌رۆك وه‌زيرێن سويدێ بۆ ئێزديان خواستيه‌

ئێزديخان نيوز:سويد  

مالا ئێزديا ل باژارێ هلسنبورى ل وه‌لاتێ سويدێ، ياداشتانامه‌يه‌كێ كو داخوازيێن ئێزديان ب خۆ ڤه‌ دگرت پێشكێشى سه‌رۆك وه‌زيرێن سويدێ كريه‌.

به‌رپرسێ مالا ئێزديا ل باژارێ هلسنبورى(شێخ جه‌لال مراد)دداخويانييه‌كێ دا تايبه‌ت بۆ ئێزديخان نيوز گۆت:مه‌ وه‌ك مالا ئێزديا ياداشتنامه‌يه‌ك به‌ريا چه‌ند هه‌يڤان پێشكێشى سه‌رۆك وه‌زيرێن سويدێ(ستيفان لوف فين)كريه‌ ده‌مێ سه‌ره‌دانا ڤى باژێرى كرى، كو ئه‌ڤ ياداشتنامه‌ چه‌ند داخوازيێن ئێزديان ب شێوه‌يه‌كى گشتى ب خۆ ڤه‌ دگرت،ئه‌و ژى ده‌ڤه‌را ده‌شتا مووسلێ و پارچه‌يا شنگالێ ببته‌ ده‌ڤه‌ره‌كا ئارام ل ژێر پاراستنا نێڤ ده‌وله‌تى،زێده‌بارى دانپێدانا ده‌ولى ب ئێزديان بێته‌ دان كو ئه‌وا ب سه‌رێ وان هاتى جينۆسايده‌،وه‌كى هه‌ردوو حكومه‌تێن عيراقێ و هه‌رێما كوردستانێ كرين،ديسان هاريكاريا ئاواره‌يێن ئێزدى يێن ل ده‌ڤه‌رێن هه‌رێما كوردستانێ و سوريا و توركيا و هه‌ر ده‌ڤه‌ره‌كا دى لێ بن بێته‌ كرن،هه‌روه‌سا ب زووترين وه‌خت كار بێته‌ كرن بۆ رزگاركرنا ره‌ڤانديێن ئێزدى،ديسا خاله‌كا دى ئه‌وه‌ دانپێدان و هاريكاريا هێزا پاراستنا شنگالێ بێته‌ كرن،ژبه‌ركو ئه‌و ژى هێزا به‌رخودانا ده‌ڤه‌رێ يه‌،ژبۆ رزگاركرنا ده‌ڤه‌رێن شنگالێ،ژلايه‌كى ديڤه‌ مه‌ ژ ستيفان لوف خواست مافێ په‌نابه‌ره‌تيێ بده‌ته‌ ئێزديێن ل سويد،هه‌ر ديسان ئه‌وێن ژنوو ژى دئێنه‌ ڤى وه‌لاتى ل پاشه‌رۆژێ.

 به‌رپرسێ مالا ئێزديا ئاشكه‌راكرژى كو وان پێشتر وه‌كى ڤێ ياداشتنامێ داينه‌ باليۆزخانه‌يێن ئه‌مريكى ل كۆبنهاغن و ستوكهۆلم،ژبه‌ر گرنگيا وێ،چنكو داخوازيێن ئێزديان ب خۆ ڤه‌ دگرت.

ناڤبرى دا زانين ژى كو چاڤه‌رێيه‌ ئه‌و ل گه‌ل سه‌رۆك وه‌زيرێن سويدێ كۆم ببنه‌ ڤه‌.