ئيرۆ كوردێن ئێزدى ده‌ست ب گێرانا رێورسمێن جه‌ژنا خدر و لياس كرن و هه‌ردوو رۆژێن پێنج شه‌مبوويێ و ئينيێ ژى جه‌ژنن.
ئه‌ڤ جه‌ژنه دكه‌فته دپێنج شه‌مبوويا ئێكێدا ژ مه‌ها سباتا رۆژهه‌لاتى ويه گرێدايه ب سروشت و وه‌رزێ چاندنێ ڤه،ئانكو ب چاندنێ دووماهيك دئێت،ئانكوسێ رۆژا به‌رى هنگى ئه‌وژى رۆژێن دووشه‌مبوويێ و سێ شه‌مبوويێ و چارشه‌مبوويێ رۆژينه و رۆژا پێنج شه‌مبوويێ جه‌ژنا خدره و رۆژا ئينيێ ژى جه‌ژنا لياسه،ديسان هه‌ر كه‌سێ ناڤێ وى خدر بت يان لياس دڤێت ئه‌ڤان هه‌رسێ رۆژيا بگرت(فه‌رزن).
هه‌روه‌سا رێورسمێن ل ڤێ جه‌ژنێ دئێنه گێران،ئه‌و ژى ل رۆژا دووشه‌مبوويێ هه‌ر ماله‌ك هنده‌ك ده‌خل و دانى ژ هه‌فت جۆرێن به‌رهه‌مێ سالێ دناڤ ئێكدا دقه‌لينن و دبێژنێ قه‌لاتك،ئه‌و ژى نيشانا ئه‌سكه‌نده‌ره ده‌مێ ده‌خل و دان و مالا وى سۆتين،هه‌ر ماله‌ك ده‌ما قه‌لاتكا چێدكه‌ت دێ ل ئاشى هێرن دێ بته وه‌كى ئارێ سۆتى و دێ دۆشابێ ل سه‌ر وى ئارى كه‌ن دێ بته پێخۆن ئه‌و ژى نيشانا خدره ده‌مێ سێ رۆژا ب رۆژى بووى و ب پێخۆنێ فتاربوويى،هه‌روه‌سا ل رۆژا چارشه‌مبوويێ ژى ل هێڤارا جه‌ژنێ هه‌رماله‌ك دێ سێنيكه‌كا پێخۆنێ ل سه‌رێ خانيێ مالێ دانێت،ژبه‌ركو دباوه‌ريا مه ئێزديان دا دڤێ جه‌ژنێ دا خدر و لياس سه‌ره‌دانا ل مالێن باش و خودان به‌خت خيڕ دكه‌ن،دوێ سه‌ره‌دانێ دا خدر و لياس هه‌ر ماله‌كا بچنێ دێ نيشانا خۆ ل وێ سێنيكا پێخونێ كه‌ن،چنكو ژبه‌ر خاترا خدر و لياس يا دانايى،ل رۆژا پێنج شه‌مبوويێ ژى سبه‌يكا جه‌ژنێ هه‌ر ماله‌ك زاده‌كى تايبه‌ت چێدكه‌ت و دبێژنێ(چه‌رخووس)ئه‌و ژى ساڤارێن هێرايى دقه‌لينن و دێ كه‌نه زاد دبته چه‌رخووس،نيشانا سه‌رده‌مێ خدرو لياسه وه‌ختێ ئه‌سكه‌نده‌ر مالا وان سۆتى و ساڤارێن وان هاتبوونه قه‌لاندن و كرنه زاد ل رۆژا پێنج شه‌مبوويێ و جه‌ژن بوو ب ناڤێ خدرى،ل رۆژا ئينيێ ژى جه‌ژنا لياسى يه،دڤێ رۆژێ دا ژ هه‌ر گونده‌كى هنده‌ك زه‌لام پێكڤه دچنه ناڤ چاندنا خۆ و هنده‌ك پێخوونێ ب ناڤ ئه‌وێ چاندنێ وه‌ردكه‌ن و هيڤى ژ خودێ مه‌زن و خدرو لياسى دكه‌ن،ئه‌و ده‌رامه‌تێ چاندى خێر و به‌ره‌كه‌ت ب كه‌فتێ.
هه‌روه‌سا ل رۆژێن رۆژيا و جه‌ژنێ نێچێر قه‌ده‌غه‌يه و سه‌ر بر نائێنه سه‌رژێكرن و ئێزدى ب رێ و رێبارێن دوور ناچن،ژبه‌ركو دباوه‌ريا مه ئێزديان دا خدر و لياس دوان رۆژادا دنێچيرێ دگه‌رت،كو هه‌ر جهه‌كى يان زه‌ڤيه‌كا دناڤ را بۆرت دێ خێر و به‌ره‌كه‌ت لێ بارت.
بۆ زانين خدرو لياس دوو چاكێن مه ئێزديانه و تێنه ناسين ب ناڤێ خودانێ مرازا،گه‌له‌ك مراز خواز هه‌نه هه‌رسێ رۆژيا دته‌وينن دا مرازا وان ب چێهبێت،هه‌روه‌سا دباوه‌ريا ئۆلا مه ئێزديان دا دشه‌ڤا جه‌ژنێ دا هه‌ر گه‌نجه‌كى دخه‌وا خۆدا ئاڤه‌كێ ل ماله‌كێ ڤه‌خۆتـدێ قيزا وێ مالێ بته رسقێ وى گه‌نجى و هه‌مان باوه‌رى ب قيزێ ژى هه‌يه.
ل هێره گۆتنه‌كا مه ئێزديان هه‌يه دبێژت:(خدر لياس سال خلاس)ئانكو نه سال ب دووماهيك دئێت به‌لێ ب چاندنێ ب دووماهيك دئێت.
