ڤه‌كۆله‌رێن تايبه‌ت يێن نه‌ته‌وه‌يێن ئێكگرتى گه‌هشتينه عيراقێ و سه‌رۆكا ڤێ گرۆپى ل هه‌ولێرێ يه و گرۆپێ وان ژى ل پارێزگه‌ها دهۆكێ يه،كو دێ ده‌ست ب ديكيۆمێنتكرنا كاره‌ساتا شنگالێ كه‌ن.
چالاكڤان زهێر خه‌لۆ
چالاكڤانێ ئێزدى(زهێر خه‌لۆ له‌زگين)دداخويانيه‌كێ دا بۆ ئێزديخان نيوز گۆت: ڤه‌كۆله‌رێن تايبه‌ت يێن نه‌ته‌وه‌يێن ئێكگرتى ل هه‌رێما كوردستانێ نه و ئه‌و پێزانينێن ئه‌ڤ ڤه‌كۆله‌ر نه دنڤيسن و كۆم دكه‌ن دێ بنه بنه‌ما بۆ گه‌نگه‌شێن نێڤ ده‌وله‌تى و گه‌نگه‌شێن كو نه‌ته‌وێن ئێكگرتى دكه‌ن ل جنێفێ،زێده‌بارێ هندێ كارێ ڤان ڤه‌كۆله‌ران بۆ ئێزديان ب تايبه‌تى و كوردان ب گشتى گه‌له‌كى گرنگه.
گۆتژى ئه‌گه‌ر هزرا بجينۆسايد ناساندنێ بێته كرن دێ راپۆرتێن ڤان ڤه‌كۆله‌ران و ب شێوه‌يه‌كى پێش چاڤ ئێنه وه‌رگرتن،بێگۆمان ئه‌و كاره‌ساتا ب سه‌رێ ئێزديان هاتى تا نهۆ ل سه‌ر ئاستێ نێڤ ده‌وله‌تى هيچ هه‌لسه‌نگاندنه‌كا تايبه‌ت نه‌هاتيه كرن و تشتێن ل شنگالێ رووداين دڤێت بتر بێنه ده‌نگڤه‌دان ل سه‌ر ئاستێ نێڤ ده‌وله‌تى دا.
چالاكڤانێ ئێزدى ئاماژه ب هندێ دا ژى كو ئه‌ڤ كه‌سێن ژ ده‌ستێن داعش ڤه‌ره‌سيايێن شايتحالا وان گه‌له‌ك يا گرنگه،ئه‌ڤجا چ كور يان كچ بت،ب تايبه‌تى ئه‌و چيرۆك و كاره‌ساتێن ب سه‌ر كچ و ژنان دا هاتين خه‌يالا مرۆڤى قه‌بوول ناكه‌ت،ئه‌ڤجا تشتێ گرنگ ئه‌وه هه‌ر كه‌سه‌ك چ شنگالى وچ ئێزدى ل ده‌رڤه‌ى شنگالێ بت دڤێت ب هشيارى ڤان كاره‌ساتان بينته سه‌ر زمان لگه‌ل ڤان ڤه‌كۆله‌ران،ژبۆ هندێ د بێنه ديكيۆمێنتكرن و بێنه پێشكێشكرن بۆ نه‌ته‌وه‌يێن ئێكگرتى.
ده‌رباره‌ى ب جينۆسايد ناساندنا كاره‌ساتا شنگالێ،زهێر خه‌لۆ دبێژت ب راستى جهێ داخێيه كو گه‌له‌ك ئاسته‌نگ دێ هه‌بن ل به‌رامبه‌ر ڤێ چه‌ندێ،ده‌مێ كو ئه‌ز ل جنێف و من گه‌نگه‌شه ل گه‌ل گه‌له‌ك دبلۆماسى و چالاكڤانێن نێڤ ده‌وله‌تى كرن،هه‌روه‌سا دكۆنفرانسێ نێڤ ده‌وله‌تى دا ژى من تاكيد ل سه‌ر ڤێ چه‌ندێ كر.
