ل دهۆكێ ئێزدى و بوسلمان و مه‌سيحى داكۆكيێ ل پێكڤه‌ژيانێ دكه‌ن
ئێزديخان نيوز:دهۆك
ب ئاماده‌بوونا نونه‌رێن بوسلمانا و مه‌سيحييا و ئێزديان،دوهى رونشتنه‌كا تايبه‌ت ل دۆر هه‌ڤناسينا دناڤبه‌را ئاينان دا هاته سازدان،كو ل دۆر ڤان كارتێكرنا ڤان پێشهاتێن داوايێ يێن عيراق تێدا ده‌ربازبووى ب شێوه‌يه‌كى گشتى و كوردستان ب تايبه‌تى ل سه‌ر په‌يوه‌نديان و پێكڤه‌ژيانا ئاين و پێكهاتان.
دڤێ كۆمبوونێ دا ئاماده‌بوويان تاكيد كرن كو دڤێت په‌يوه‌نديێن دناڤبه‌را ئاين و پێكهاته‌يان دا بتر بێنه خورتكرن و به‌رده‌وام بن ل سه‌ر ڤێ چه‌ندێ، پاشى هه‌ر ئێك ژ نونه‌رێ ده‌سته‌يا بلندا بنگه‌هێ لالش و ئێكه‌تيا زانايێن ئاينێ ئيسلامێ ومه‌سيحيان به‌ياننامه‌يه‌ك ده‌رێخست،دڤێ به‌ياننامێ دا مه‌لا احسان ريكانى سه‌رۆكێ ئێكه‌تيا زانايێن ئيسلامێ ئاماژه دا وێ چه‌ندێ كو داعش ده‌وله‌ته‌كا كفره و نه يا ئيسلاميه و يا دووره ژ ئێتيكێن دينێ ئيسلامێ،له‌وا ژ خه‌لك و گه‌نجێن خۆ هيڤيدارين ئه‌ڤێ رێكخراوێ ئيدانه بكه‌ن،پاشى شێخ شامۆ سه‌رۆكێ ده‌سته‌يا بلندا بنگه‌هێ دخاله‌كا دى يا به‌ياننامێ دا ئه‌وا دڤێ رونشتنێ دا ده‌ركه‌فتى گۆت:به‌حسا كانتۆنێ ل شنگالێ،يانكو دابه‌شكرنا ئێزديانه ل كوردستانێ و ئه‌ڤه يا ره‌تكريه،ل دووڤ را نونه‌رێ مه‌سيحيان فيليب داود خور گۆت: دهۆك پايته‌ختێ پێكڤه‌ژيانا دينى يه وئه‌م وان كه‌سا ئيدانه دكه‌ين يێن ب رێيا مالپه‌رێن كۆمه‌لايه‌تى هێرشكرينه سه‌ر ئاينان.
ل داوييا كۆمبوونێ نونه‌رێن ئاينان رازى بوون كو ئه‌و دێ به‌رنامه‌يه‌كى تايبه‌ت بۆ پێكڤه‌ژيانا سلمى دناڤبه‌را هه‌موو پێكهاته‌يێن جڤاكى دا و تايبه‌ت ل قوتابخانا و زانكۆيان ل دهۆكێ دانێن،ديسان دانه‌يه‌كا ڤێ به‌ياننامه‌يێ يا داين دێ بۆ رێڤه‌به‌رييا گشتيا په‌روه‌رده‌يا دهۆكێ فرێكه‌ن.
