رۆژنامه‌يا ده‌نگێ لالش ياهه‌فتيانه‌يه و ژبال ده‌سته‌يا بلندا بنگه‌هێ لالش ل دهۆكێ هه‌موو رۆژێن ئێكشه‌مبوويا ده‌ردكه‌فت،كو دبته ئێكه‌مين رۆژنامه دڤى ماوه‌يێ درێژدا به‌رده‌وامى دايه كارێ خۆ بێ سه‌كناندن و بوويه ژێده‌ره‌كى سه‌ره‌كى بۆ ناساندنا رێورسم و بيروباوه‌رێت ئێزدياتيێ بۆ خه‌لكێ كوردستانێ و جيهانێ ،هه‌ڤده‌م ژى ڤێ رۆژنامه‌يێ گرنگيه‌كا تايبه‌ت دايه وێ كاره‌ساتا ب سه‌رێ خه‌لكێ شنگالێ دا هاتى.
سه‌رنڤيسه‌رێ رۆژنامه‌يا ده‌نگێ لالش(شه‌مۆ قاسم)بۆمالپه‌را ئێزديخان نيوز دبێژت:دناڤا راگه‌هاندنا كوردى دا هنده‌ك رۆژنامه و گۆڤارا جهێ وان يێ خويايه،تايبه‌ت دراگه‌هاندنا كوردێن ئێزدى ده،رۆژناما ده‌نگێ لالش ژى دسالا خۆ يا دوازدێ دا هنه‌ر و رۆله‌كى گرنگ و به‌رچاڤ هه‌يه و ئه‌م دكارن بێژن يه پرۆفيشيناله و ل رێزا ئێكێ دئێت،ژبۆ به‌لاڤكرن و گه‌هاندنا نوچه‌يان بۆ ناڤ خه‌لكێ مه،ديسا گه‌هاندنا ئاريشێن ده‌ڤه‌رێن ئێزدى نشين.
شه‌مۆ قاسم گۆتژى ده‌نگێ لالش هه‌ر ژ ده‌ستپێكا ده‌ركه‌فتنا خۆ ب شێوێ به‌لاڤۆك ده‌نگێ ئێزديان گه‌هانديه و خۆ ل ئاريشێن وان كريه خودان،كو ئێكه‌مين رۆژنامه‌يه دڤى ماوه‌يێ درێژدا به‌رده‌وامى دايه كارێ خۆ بێ سه‌كناندن وهه‌رده‌م بوويه مايێ هشياركرنا هه‌ستێ كوردايه‌تيێ دناڤ دجڤاكێ ئێزديده ژلايه‌كى ڤه،هه‌روه‌سا ژلايه‌كى ديڤه بوويه ژێده‌ره‌كى سه‌ره‌كى بۆ ناساندنا رێورسم و بيروباوه‌رێت ئێزدياتيێ بۆ خه‌لكێ كوردستانێ و جيهانێ.
سه‌باره‌ت رۆمالكرنا كاره‌ساتا شنگالێ ب تايبه‌تى،سه‌رنڤيسه‌رێ رۆژنامه‌يا ده‌نگێ لالش خوياكر،كو هه‌ر ژ ده‌ستپێكا كاره‌ساتا شنگالێ و ده‌ڤه‌رێن دى يێن كوردستانى ده‌مێ كه‌فتينه دبه‌ر شالاوا داگيركرنا رێكخراوا تيرۆرستيا داعشێ ل ده‌ستپێكا هه‌يڤا ئابا سالا 2014ێ و هه‌تا نهۆ بوويه رۆژنامه‌كه تايبه‌ت ب روودانێن ڤێ كاره‌ساتێ ب هه‌ر هه‌شت لاپه‌رێن خۆ يێ ب زمانێ كوردى و ئه‌ره‌بى ڤه،كو بوويه ژێده‌ره‌ك بۆ وه‌رگرتنا هه‌ر پێزانينه‌كێ ل دۆر ڤێ كاره‌ساتێ،زێده‌بارى وێ چه‌ندێ ڤێ رۆژنامێ گازندێن ئاواره‌يێن كوردێن ئێزدى و ب تايبه‌ت يێن شنگالێ گه‌هاندينه جهێن ده‌ستهه‌لات و شۆله‌ژێ.
هه‌ر ل دۆر رۆلێ وێ درۆمالكرنا كاره‌ساتا شنگالێ دا،سكرتێرێ به‌شێ ئه‌ره‌بى يێ رۆژنامه‌يا ده‌نگێ لالش(يوسف برى)دياركر،ب تايبه‌ت نهۆرۆژنامێ گرنگيه‌كا مه‌زن دايه كاره‌ساتا شنگالێ ل ڤى به‌شى و هنده‌ك بابه‌تێن گرێدايى ب كاره‌ساتێ ڤه بن مه ل هه‌موو ژماره‌يێن رۆژنامێ دا به‌لاڤكرينه.
ژبال خۆ ڤه رۆژنامه‌ڤان (عزيز الشركانى) ده‌رباره‌ى رۆلێ رۆژناما ده‌نگێ لالش درۆمالكرنا ڤى بارودۆخێ نهۆ شنگال تێدا ده‌رباز دبت گۆت: رۆژناما ده‌نگێ لالش كاره‌كى باشكريه ل رۆمالكرنا ڤى بارودۆخێ نهۆ شنگال تێدا ده‌رباز دبت،هه‌ر چه‌نده رۆژنامه‌كه هه‌فتيانه‌يه و تنێ هه‌شت لاپه‌رن،لێ كاريه رۆلێ خۆ دناڤ جڤاكا ئێزديان دا ببينت و هه‌ر تشته‌كى ب ئێزديان ڤه يێ گرێدايى بت به‌لاڤكريه هه‌ر ل چى ده‌ڤه‌را ئێزديان بت. شركانى دووپاتكر ژى كو بابه‌تێن باش و ب مفا دڤێ رۆژنامێ دا هه‌نه و ل ده‌رڤه‌ى ده‌ڤه‌رێن ئێزديان ژى خه‌لكه‌ك هه‌يه دخونت،هه‌تا جاران من ديتيه كه‌نالێن راگه‌هاندنێ بابه‌ت ژێ وه‌رگرتينه و بوويه ژێده‌ر بۆ وانا.
هه‌روه‌سا نڤيسه‌ر(جه‌مال كۆدى) ل دۆر رۆلێ رۆژنامه‌يا ده‌نگێ لالش دبێژت:هه‌ر ژ ده‌ستپێكا ده‌ركه‌فتنا رۆژنامێ ل سالا 2003ێ تانهۆ كاريه خزمه‌ته‌كا باش و به‌رچاڤ بۆ ئه‌ده‌ب و ره‌وشه‌نبيريا ئێزديان بكه‌تن،چ ژلايێ به‌لاڤكرنا راوبيروبۆچۆنێن نڤيسكارو چالاكڤانێن ئێزديا،ديسان دڤان كاودانێن نهۆ ئێزدى تێدا دژين كاريه خۆ ل گه‌له‌ك بابه‌تان بكه‌ته خودان،هه‌روه‌سا هه‌ر بوويه‌ره‌ك يان گهۆرينه‌ك دناڤ ئێزديان دا په‌يدا بتن،ب زووترين ده‌م درۆژنامێ دا دئێنه به‌لاڤكرن.
ناڤبرى ئاماژه داوێ چه‌ندێ ژى كو رۆژنامه‌يا ده‌نگێ لالش كاريه تاراده‌يه‌كى باش جهێ خۆ درۆژنامه‌ڤانيا ده‌ڤه‌را بادينان دا بكه‌تن.
بۆ زانين رۆژنامه‌يا ده‌نگێ لالش ب هه‌شت لاپه‌ران ب هه‌ردوو زمانێن كوردى و ئه‌ره‌بى ل هه‌موو رۆژێن ئێك شه‌مبوويا و ب ديزاينه‌كا پێشكه‌فتى دئێته وه‌شاندن.
رۆژنامه‌يا ده‌نگێ لالش ياهه‌فتيانه‌يه و ژبال ده‌سته‌يا بلندا بنگه‌هێ لالش ل دهۆكێ هه‌موو رۆژێن ئێكشه‌مبوويا ده‌ردكه‌فت،كو دبته ئێكه‌مين رۆژنامه دڤى ماوه‌يێ درێژدا به‌رده‌وامى دايه كارێ خۆ بێ سه‌كناندن و بوويه ژێده‌ره‌كى سه‌ره‌كى بۆ ناساندنا رێورسم و بيروباوه‌رێت ئێزدياتيێ بۆ خه‌لكێ كوردستانێ و جيهانێ ،هه‌ڤده‌م ژى ڤێ رۆژنامه‌يێ گرنگيه‌كا تايبه‌ت دايه وێ كاره‌ساتا ب سه‌رێ خه‌لكێ شنگالێ دا هاتى. 
