برياره‌كا گرنگ يا وه‌لاتێ ئيتاليا بۆ ئێزديان

ئێزديخان نيوز:

كۆمبوونا ڤيان ده‌خيل دگه‌ل شاندێ ئيتالى

ل هه‌ولێرێ په‌رله‌مانتارا ئێزدى ڤيان ده‌خيل پێشوازى ل شانده‌كێ بلندێ په‌رله‌مانێ ئيتاليا،كو ب سه‌رۆكاتيا پرۆفيسۆر فابريزيو سيجيتو سه‌رۆكێ لژنا په‌يوه‌نديێن ژ ده‌رڤه‌،پرۆرفيسۆر ماريا كاوزا و ماريو مارازيتى ئه‌ندامێن په‌رله‌مانێ ئيتاليا،ب ئاماده‌بوونا باليۆزێ ئيتاليا ل به‌غدايێ و كونسلێ ئيتالى ل هه‌ولێرێ كر.

 دديداره‌كێ دا به‌حسا ره‌وشا ئێزديان هاته‌ كرن،ب تايبه‌ت پشتى تيرۆرستێن داعش هێرشكرينه‌ سه‌ر ده‌ڤه‌رێن وان و ب تايبه‌تى ل شنگالێ.

نڤيسينگه‌ها راگه‌هاندنا په‌رله‌مانتار ڤيان ده‌خيل راگه‌هاند،دڤێ كۆمبوونێ دا شاندێ ئيتالى به‌رهه‌ڤى و پشته‌ڤانيا خۆ بۆ ئێزديان ده‌ربرى،ب تايبه‌ت ژى بۆ رزگاركرنا كچ و ژنێن ئێزديان يێن ره‌ڤاندى.

 دلايه‌كى دى يێ ڤێ ديدارێ دا ئيتاليا ئاماده‌يا خۆ دياركر بۆ پێشوازيكرنا زيانپێكه‌فتيان و ب تايبه‌ت كچێن تووشى زيانێن ده‌روونى بووين ژ تاوانێن تيرۆرستێن داعش،دڤى بياڤى دا دێ چاره‌سه‌ريا وان ل دام و ده‌زگه‌هێن حكومى يێن ئيتاليا كه‌ين،هه‌روه‌سا دێ پێشوازيێ ل نه‌خۆشان ژى كه‌ين.

دته‌وه‌ره‌كى دى يێ ڤێ ديدارێ دا ڤيان ده‌خيل ئێش و ئازارێن ئاواره‌يێن ئێزدى دگه‌ل نێزيك بوونا وه‌رزێ زڤستانێ بۆ شاندێ ناڤبرى دان دياركرن،شاندێ ئيتالى دووپات كر كو ئه‌و دێ هاريكاريان پێشكێشى ئاواره‌يان كه‌ن.