په‌رله‌مانێ ئه‌وروپا ل سه‌ر كه‌يسێ ئافره‌تێن كوردێن ئێزدى برياره‌ك ده‌رێخست
ئێزديخان نيوز:
نونه‌رێ حكومه‌تا هه‌رێما كوردستانێ ل ئێكه‌تيا ئه‌وروپا راگه‌هاند، كو په‌رله‌مانێ ئه‌وروپا ل سه‌ر كه‌يسێ ئافره‌تێن كوردێن ئێزدى پرۆژێ بريارا 2971ده‌رێخست.
نونه‌رێ حكومه‌تا هه‌رێما كوردستانێ ل ئێكه‌تيا ئه‌وروپا(دلاوه‌ر خالد)ب ئێزديخان نيوز راگه‌هاند،كو پشتى چه‌ندين رونشتنا و كۆمبوونا ل گه‌ل كوتله و گرۆپێن جودايێن ناڤ په‌رله‌مانێ ئه‌وروپا و په‌يوه‌ندى كرى ب سه‌رۆك و ئه‌ندامێن گرۆپێ دۆستێن كوردستانێ ل په‌رله‌مانێ ئه‌وروپا،كۆمبوونه‌كا گرنگ و فه‌رمى ل په‌رله‌مانى ب رێڤه چۆ،كو تايبه‌ت بوو ب پرسا ره‌ڤاندن و توندوتيژيا دژى ئافره‌تان ژ ده‌ستێن تيرۆرستێن داعش و ب تايبه‌تى ئافره‌تێن ئێزدى،ل داويا كۆمبوونێ بريارا 2971هاته ده‌رێخستن،كو به‌شه‌ك ژ ناڤه‌رۆكا وێ ژڤان خالان پێك هاتيه:
1.ئه‌و تاوانێن داعش دژى خه‌لكێ شنگالێ ئه‌نجام داين و ب تايبه‌ت ره‌ڤاندن و كوشتن و توندوتيژى ب تاوانا دژى مرۆڤايه‌تيێ دئێنه ناساندن و تاوانبار دڤێت لدووڤ ياسايێ بێته سزادان.
2.پرۆژێ ڤێ بريارێ ئاماژه ب كوشتن و ره‌ڤاندنا 3133وه‌لاتيێن ئێزدى دا،كو ژوانا 2305 كه‌س هاتينه ره‌ڤاندن و ژوان 412زارۆكن،هه‌روه‌سا ل دووڤ ئاماره‌يان ناڤبه‌ينا 5000تا 7000ئافره‌تێن وێ ده‌ڤه‌رێ ب گشتى هاتينه ره‌ڤاندن،كو ل پێ پێزانينان ل تلعفه‌ر ل پێنج سه‌نته‌ران هاتينه گرتن.
3.په‌رله‌مانێ ئه‌وروپا داخوازێ ژ حكومه‌تا عيراقێ دكه‌ت ببته ئه‌ندام ل (rom statute) بۆ هندێ دادگه‌ها تاوانا نێڤ ده‌وله‌تى ل لاهاى بكارت دووڤچۆنێ بۆ وان تاوانبارن بكه‌ت وه‌كو تاوانبارێن دژى مرۆڤايه‌تيێ.
4.پشتگريا بريارا ئه‌مريكا دكه‌ت بۆ پشتگرى و هاريكاريا حكومه‌تا هه‌رێما كوردستانێ و عيراقێ ل شه‌رێ دژى تيرۆرێ ب هاريكاريا سه‌ربازى و مرۆڤى،ژ وه‌لاتێن ئه‌ندام داخواز دكه‌ت هاريكاريا زێده‌تر بكه‌ن ب تايبه‌تى ل ده‌مێ زڤستانێ و سه‌رما نێزيك بوويه،هه‌روه‌سا دخوازت هاريكاريا ئاواره‌يێن چيايێ شنگالێ بكه‌ت.
5.داخوازێ ژ وه‌لاتێن ئه‌ندام و نه‌ته‌وه‌يێن ئێكگرتى دكه‌ت هاريكاريا زێده‌تر ب ئاواره‌يان بده‌ن ب تايبه‌تى زارۆكان و ئافره‌تان.
6.داخوازێ ژ وه‌لاتێن ئه‌ندام ل ئێكه‌تيا ئه‌وروپا و رێكخه‌رێ بلندێ ئێكه‌تيا ئه‌وروپا بۆ هاريكاريكرنا وان ئافره‌تێن ژ ده‌ستێن داعش رزگاربووين وئه‌وێن توشى نه‌خۆشيێ بووين سه‌نته‌رێن تايبه‌ت بێنه ڤه‌كرن بۆ چاره‌سه‌ركرنێ و گه‌هاندنا هاريكاريێن پێدڤى(special post_traumatic).
نونه‌رێ حكومه‌تا هه‌رێما كوردستانێ ل ئێكه‌تيا ئه‌وروپا ئه‌و چه‌نده ژى دا دياركرن،كو هه‌ولێن نونه‌راتيا حكومه‌تا هه‌رێما كوردستانێ ل ئێكه‌تيا ئه‌وروپى به‌رده‌وامن بۆ ناساندن و كۆمكرنا پالپشتيا نێڤ ده‌وله‌تى بۆ هه‌رێمێ.
