ل دوڤ فه‌رمانا پارێزگارێ دهۆكێ و رێنمايێن رێڤه‌به‌رێ گشتيێ چاڤدێرى و گه‌شه‌پيدانا جڤاكى،كۆمه‌كا گه‌نجێن خۆبه‌ش هاتنه راسپاردن بۆ تۆماركرنا ناڤێن زارۆكێن بێ سه‌ميان و په‌ككه‌فتيێن ئاواره‌يێن ده‌ڤه‌را شنگالێ و ده‌وروبه‌رێ مووسلێ.
سه‌رپرشتيارێ ڤێ پرۆسه‌يێ رضا نايف رێڤه‌به‌رێ تۆرا پاراستنا جڤاكى ل دهۆكێ،سه‌ر ب رێڤه‌به‌ريا گشتى يا چاڤدێرى و گه‌شه‌پێدانا جڤاكى راگه‌هاند:ل دوڤ فه‌رمانا پارێزگارێ دهۆكێ فه‌رهاد ئه‌مين ئه‌تروشى ورێنمايێن رێڤه‌به‌رێ گشتيێ چاڤدێرى و گه‌شه‌پيدانا جڤاكى حسێن على اسعد كۆمه‌كا گه‌نجێن خۆبه‌ش هاتنه راسپاردن بۆ تۆماركرنا ناڤێن زارۆكێن بێ سه‌ميان و په‌ككه‌فتيێن ئاواره‌يێن ده‌ڤه‌را شنگالێ و ده‌وروبه‌رێ مووسلێ،ل سه‌ر ئه‌ركێ پارێزگارێ دهۆك و ژبۆ پاراستنا وان زارۆكێن بێ ده‌يك و باب دێ جهه‌كى تايبه‌ت ب چاڤدێريا وان ئێته ڤه‌كرن و دێ هه‌ول ئێته دان په‌ككه‌فتيێن ئاواره ژى ب هه‌ماهه‌نگيا پارێزگه‌ها دهۆك و رێڤه‌به‌ريا گشتى بێنه تۆماركرن دپرۆژێ تۆرا پاراستنا جڤاكى دا.
ناڤبرى ئاماژه ب هندێ دا ژى كو گه‌نجێن خۆ به‌خش ده‌ست ب كۆمكرنا داتايان كريه و ل ده‌مه‌كى نێزيك ئه‌و زارۆك ل دوڤ ياسا و رێنماييان دێ سودمه‌ند بن ژ هاريكاريا پارێزگارێ دهۆكێ.
دڤێ راگه‌هاندنێ دا سه‌رپرشتيارێ ڤێ پرۆسه‌يێ رضا نايف دخوازت هه‌ر هاولاتى و خێرخوازه‌كى پێزانين ل سه‌ر زارۆكێن بێ ده‌يك و بابێن ئاواره هه‌بن ل سه‌رانسه‌رى پارێزگه‌ها دهۆكێ،جهێ ئاكنجيبوونا وان ب رێيا نامه‌كێ بۆ پيچێ مه بنێرن.
