ل دهۆكێ ئێزدى ل چاره‌يا كێشه‌يێن خۆ دگه‌رن
ئێزديخان نيوز:دهۆك
بنگه‌هێ لالش يێ ره‌وشه‌نبيرى و كۆمه‌لايه‌تى تايێ شاريا و خانكێ ب هه‌ڤكارى دگه‌ل نڤيسينگه‌ها لالش ل دهۆكێ،دوهى رونشتنه‌كا ڤه‌كرى ل دۆر(ئێزدى،ماف ،كه‌مينه،سياسه‌ت،راگه‌هاندن)،ل هۆلا بنگه‌هێ لالش ل دهۆكێ سازدا،كو تێدا ته‌كه‌زى ل وێ چه‌ندێ هاته كرن ئه‌ڤ جۆره رونشتنه دبه‌رده‌وام بن و ببنه رێگه چاره‌يه‌ك ژبۆ چاره‌سه‌ركرنا كێشه‌يێن ئێزديان.
ب ئاماده‌بوونا ژماره‌يه‌كا په‌رله‌مانتار و كه‌سايه‌تيێن سياسى ورۆژنامه‌ڤان و مامۆستا و ره‌وشه‌نبيرێن ئێزديان ئه‌ڤ رونشتنا ڤه‌كرى دوهى (26/7/2014)ێ ل سعه‌ت پينجى ئێڤارى ل هۆلا بنگه‌هێ لالش ل دهۆكێ هاته سازدان،هه‌روه‌سا دگه‌ل ده‌ستپێكرنا ڤێ رونشتنێ سه‌رۆكێ ده‌سته‌يا بلندا بنگه‌هێ لالش به‌رێز شێخ شامۆ په‌يڤه‌ك پێشكێشكر،پاشى په‌نه‌لا ئيكێ يا ڤێ رونشتنێ ده‌ستپێكر و تێدا دوو سمينارهاتنه سازدان، ئه‌و ژى ئێك ل سه‌ر جهێ ئێزديان دسياسه‌تێ دا ل عيراقێ و كوردستانێ هه‌ر ژ دامه‌زراندنا كۆمارا عيراقێ ل سالا 1958ێ ژ لايێ به‌رێز سه‌يدۆ چه‌تۆ سه‌رۆكێ كوتله‌يا برايه‌تى و پێكڤه‌ژيانێ دئه‌نجومه‌نێ پارێزگه‌ها مووسلێ دا هاته پێشكێشكرن،هه‌روه‌سا سمينارا دى ژى ل دۆر ڤالاتيا ياسايى...ياسايا كاروبارێن كۆمه‌لايه‌تى وه‌ك نمونه ژ لايێ به‌رێز مافپه‌روه‌ر سعود مستۆ ڤه هاته گۆتن.
پاشى پشتى بێنڤه‌دانێ په‌نه‌لا دوويێ يا ڤێ رونشتنێ ده‌ستپێكر و تێدا دوو سمينار ئێك ژێ ل دۆر كه‌مينه دجارنامێن نێڤده‌وله‌تى دا ئێزدى وه‌ك نمونه ژ لايێ به‌رێز جه‌لال له‌زگين به‌رپرسێ بنگه‌هێ لالش تايێ شاريا ڤه و سمينارا دى ژى ل دۆرره‌وشا ئێزديان پشتى ده‌هى حوزيرانێ ل عيراقێ و كوردستانێ ژ لايێ به‌رێز خدر دووملى به‌رپرسێ راگه‌هاندنا زانكۆيا ڤه هاتنه پێشكێشكرن.
پاشى ده‌رگه‌هێ گه‌نگه‌شێ ل سه‌ر ڤان هه‌ر چار سميناران هاته ڤه‌كرن و ئاماده‌بوويان پێشنيار و بۆچۆنێن خۆ ل سه‌ر دان و دان خوياكرن كو كێشێن ئێزديان بێنه چاره‌سه‌كرن.
ل داويێ ژى داخوازى هاته كرن ئه‌ڤ جۆره رونشتنه دبه‌رده‌وام بن،ژبۆ چاره‌سه‌ركرنا كێشه‌يێن ئێزديان.
